Nanta minta peranak Kapit besaup enggau perintah ngemansangka pelilih menua nya
KAPIT: Sapit Menteri Pemansang Menua Pesisir enggau Kandang Menua, Datuk Alexander Nanta Linggi madahka peranak menua Kapit patut begempung, besaup dalam semua pengawa dikena ngemansagka pelilih menua nya.
“Menua Kapit diatu nyau majak mansang, nya alai kitai patut beserakup sama ngemansangka menua tu kelebih agi sida ke bejalaika pengawa dagang. Rayat di menua Kapit tu mega patut meri sukung sida lebuh maya perintah ngatur mayuh bengkah program pemansang. Ukai semina datai ngulu aja, tang datai enggau buah runding awakka nyamai perintah ngatur utai ke patut.” ku iya.
“Diatu menua Kapit majak mansang laban perintah endang enda kala melakangka rayat di menua Kapit tu. Pemansang sereta bantu ari perintah mayuh udah diberi. Projek ke besai enggau mit mega endang semampai diberi baka projek jalai alun.
Projek jalai alun ke bisi digaga ukai semina meri penyenang ngagai rayat Kapit, tang mega meri penyenang ngagai rayat ke diau di pelilih menua Song enggau Kanowit. Projek jalai alun tu mega meri peluang pengawa ngagai semua rayat ke diau semak enggau pelilih menua nya. Enggau chara ngemansangka tanah sida dikena betaman betupi, chara nya ulih nyadika pun penatai pemisi sida. Pemansang ke bisi diberi perintah ngagai rayat di meua tu patut diperatika rayat enggau manah ”, ku iya.
Alexander madahka perintah mega deka ngemansangka menua Kapit sereta deka meri jalai guna internet. Iya mega madah pemesai ari Opis Komiti Komunikesyen Mul- timedia Malaysia (SKMM) enggau bala bukai ari opis nya udah ngelawa menua Kapit dua hari ke udah. Sida iya datai ke Kapit lalu beratika sekeda endur ke deka nyadi palan sida ngaga menara telekomunikesyen dikena ngemansangka menua nya.
Dalam pengawa mantu orang ke bisi digaga bala Gerempung Ukai Perintah (NGOs’), Alexander mega madah ke semua bala NGOs’ di menua Kapit chukup manah. Mayuh pengawa sida ke nulung sereta mantu bala ke enda entu benasit baka sida ke merinsa pengidup. Pengawa ke bansa tu patut dipajakka dikena ngenataika kaul ke manah entara NGOs’ enggau perintah sereta rayat ke seranta.
Sekretari Sulit Alexander, Sylvester Insor, Pemesai Gerempung Pemansang, Ambrose Abong, Pemesai bagi Opis Tanah enggau Survey, Watson Awan, Kaban Majlis Tertinggi PRS, Stanley Nyitar, Chairman Gerempung Pengawa Dagang Cina, Dato Yong Hua Sying, Pemanca Yong Thu Fook, Kapitan Neo Kee Hui enggau Kapaitan Micky Ngu sereta lebih 200 iku orang ke bisi datai.