Graduet UNIMAS dikearap ulih nyadi ejen ubah dalam komuniti
KOTA SAMARAHAN: Universiti Malaysia Sarawak (UNIMAS) deka majakka pengawa nempa graduet ke ngembuan runding ‘kelas satu’ ngambika tau nyadi ejen ubah dalam komuniti.
Mandal Chanselor UNIMAS Prof Dato Dr Mohamad Kadim Suaidi madah, kelimpah ari ngemeratka pekara akademik sereta penegap penyerakup, pelajar dilatih ngerandang pengering diri.
“UNIMAS megai tanggungpengawa besai nempa raban graduet ke ngembuan runding ‘kelas satu’ ti dikearap nyadi ejen ubah dalam komuniti.
“Enti kitai deka meda juluk nya dijapai, pelajar patut sedia napi semua latih ngambika tau nyadi peturun ke dikearap menua,”ku iya.
Iya mansutka jaku nya ba pengawa Angkat Sumpah Pelajar Baru UNIMAS ungkup sesi September 2014/2015 di Dewan DeTAR Putra Unimas ditu, kemari.
Sesi baru nya ngerijista 3,301 pelajar ti ngangkat sumpah nyadi nembiak UNIMAS nyengkaum 12 iku ari menua luar.
Ba kaul ke sama, Kadim madah nembiak mega patut ngembuan pengeliat maya napi semua program latih di UNIMAS ngambika juluk perintah ti deka nempa modal mensia ‘kelas satu’ ulih dijapai.
“Pengidup di universiti begunaka runding ke lanjau lalu ketegal nya aku ngelalau semua nembiak baru nyikap diri ba pekara pengerai tubuh, runding enggau emosi maya nempuh semua penguji ditu,”ku iya.
Iya ngansak sida ke baru ngambika seruran ngingat sumpah ke udah digaga ngambika enda ngelebu apai indai ti deka meda sida teulihka pemujur.
“Aku arapka nembiak baru ulih diau di kampus tu enggau manah nyentuk ke graduet,’ku iya.
Bela datai Chairman Lembaga Pengarah Unimas Datu Dr Hatta Solhi, Sapit Mandal Canselor ( Pekara Pelajar enggau Alumni) Prof Mohd Fadzil Abdul Rahman, Sapit Mandal Canselor ( Pansik enggau Inovasyen) Prof Dr Kopli Bujang, Pemangku Pengerijista Abu Bakar Ibrahim enggau orang bukai.