Kena napi peminta modal mensia, perintah Sarawak numbuh 24 buah palan pematih
KUCHING: Perintah negeri numbuhka 24 buah palan pematih di serata Sarawak dikena ngenegapka seraya nempa raban nembiak awakka ulih tetapika peminta guna pemansang modal mensia lebuh manggai taun 2030.
Menteri Muda Pemansang Raban Nembiak Datuk Dr. Stephen Rundi Utom ( gambar) madahka, palan pematih nya nyendiaka kos teknikal ti ulih nempa modal mensia ti dilatih sereta besedia nangkup pemayuh peluang pengawa dalam kandang SCORE.
Iya madah, palan pematih nya di menua tu deka ditambah bererenggat.
“Entara program ti udah ditumbuhka perintah negeri dikena ngenegap sereta nempa raban nembiak di menua tu awakka ulih tetapi peminta modal mensia ba pengawa pemansang mang- gai ba taun 2030, perintah negeri numbuhka 24 buah palan pematih di serata Sarawak.
“Naka Jun 2014, penyampau nembiak tauka pelatih ti udah tembu belatih bisi 12,349 iku.
“Tagit penyampau nembiak tauka penyereta enggau graduet ari 2014 ngagai 2010 iya nya urung 20,000 iku penyereta lalu kitai ngara- pka mujur ngelatih 35,000 iku lebuh manggai taun 2030,” ku iya.
Dr. Rundi mantaika pekara nya lebuh nyaut tanya ari Dr. Abdul Rahman Junaidi (BN-Pantai Damai) enggau Dr. Hazland Abang Hipni (BN - Demak Laut) maya sesi tanya saut nyerumba Aum Kunsil Negeri (DUN) Ke-17, Aum Kedua bagi Penggal Ke- empat ditu, kemari.
Bejaku baru iya madah, dikena meransang raban nembiak nyereta bidang dagang, perintah negeri mega numbuhka Program Tabung Usahawan Belia (TUBE).
“Program (TUBE) tu dipejalaika enggau kerejasama entara perintah negeri enggau (SME) Small Medium Enterprise Corporation Malaysia Pampang Sarawak.
“Tuju tu dikena ngenegapka raban nembiak ngambika nyadi orang dagang ti nyulut,” ku iya.
Kelimpah ari nya iya madahka opis menteri deka ngenegapka mayuh agi program ungkup raban nembiak awakka negeri tu mujur nempa nembiak ti ngembuan tanggungpengwa, ulih ngatika diri enggau tau dikearapka.
Dikearapka program nya ulih meri penemu ti mungkur semua pekara sereta ulih tetapika peminta guna pemansang modal mensia lebuh maggai taun 2030, ku iya.
“Program bukai ti dipejalaika dikena ngenegapka raban nembiak baka Program Pembentukkan Sahsiah Belia, Program Kepimpinan Belia, Program Pembangunan Keusahawan Belia, Program Transformasi Belia enggau Program Kecermerlangan Sukan,” ku iya.