Biodiesel B7 deka dikena sektor sabsidi minyak diesel di Sabah enggau Sarawak berengkah bulan Disember 2014
KUCHING: Malaysia, menua kedua pemadu besai ngeluarka minyak sawit nangkan Indonesia deka ngepunka program Biodiesel B7 dikena dalam sektor sabsidi diesel di Sabah enggau Sarawak belabuh ari bulan Disember taun tu ke alai pengawa tu dikearap ulih nambahka pemayuh penguna domestik biodiesel ari minyak sawit.
Menteri Industri Bekebun Bedandang Besai enggau Komoditi Datuk Amar Douglas Uggah Embas madah, atur pengawa nya deka digaga berenggat ari bulan November tu di semenanjung, lalu di Sarawak, Sabah enggau Wilayah Persekutuan Labuan deka dipunka dalam bulan Disember.
Iya madah kena 17 Oktober tu tadi, kabinet udah ngemendarka program ngena B7.
Program tu deka nyadi mandatori ba sektor besabsidi kelimpah ari semua stesyen minyak deka nyendiaka Biodiesel B7 nganti Biodiesel B5 ke benung dijual diatu.
Uggah madah Program B7 deka belabuh ari taun baru tu ila.
Enti sema program tu dikena ila, B7 begunaka 700,000 ton minyak sawit setaun, ke dikearap ulih ngenegapka rega minyak sawit.
“Program B7 dijangka begunaka urung 575,000 ton biodiesel, ke ngujungka kitai ngelimat urung 667.6 juta liter diesel setaun.
“Kilang ke ngeluarka Biodiesel ungkup Sarawak ke ngeluarka B7 deka tembu ba bulan baru tu ila,” ku iya madah pengudah ngepunka Seminar Nasional dalam pekara ‘Palm Oil Milling, Refining, Environment and Quality’ ( POMREQ) di Kuching apin lama ke udah.
Iya mega madah, atur ngena program B7 deka ngengkah Malaysia sebaka enggau sekeda menua mansang bukai ngena kuasa ke tau dikena baru.
“Bechuntoka menua European Union (EU) udah ngena B7 ari taun 2009, enggau Thailand belabuh ngena B7 ari bulan Januari taun tu.
“Indonesia udah ngena B7.5 ari bulan Februari 2012, enggau Colombia ngena B8 enggau B10 ari minyak sawit bepelasarka biodiesel,” ku iya.
Iya nandu, kena ngepunka program B7, Perintah udah ngaga mayuh siri kaul dagang nyengkaum Japan Automobile Manufacturer Association, Gerempung Automotif Malaysia, sereta kompeni petroleum menua tu.
“Bepelasarka jurai naka ke diatu, nadai isu dibantai pasal program ngena B7,” ku Uggah.
Iya madah pemansang ngena program B7 mandangka penemu perintah ngena mayuh macham chara minyak sawit mata, ke dijangka ulih ngurangka kitai bepanggai ba diesel petroleum, nyengkaum ‘greenhouse gas emissions’ nengah kuasa ke manah ke rampa menua.
Pansik ba Biodiesel ngena minyak sawit udah dipejalaika Lembaga Minyak Sawit Malaysia (MPOB) urung taun 1980 menya. Dalam pansik nya, MPOB bekerejasama enggau pengeluar kerita tebilang, Mercedes- Benz nguji pengulih di jalai alun ke mungkur 36 bas komersil.
Ari pansik nya mandangka biodiesel sawit ulih dikena tekala nya tauka digulai enggau diesel sereta enda ibuh ngubah injin kerita.
Minyak sawit biodiesel komersil siru ke rampa menua, dalam taun 2006 lebuh sekeda kerita Angkatan Tentera Malaysia ( ATM) enggau Opis Dewan Bandaraya Kuala Lumpur (DBKL) ngena biodiesel nya lanchar bejalaika pengawa.
Ari bulan Jun ngagai November 2011, program B5 di Malaysia mujur dipejalaika mungkur Kuala Lumpur, Putrajaya, Melaka, Negeri Sembilan. Nangkan nya, iya disambung ngagai Johor kena bulan Julai 2013, lalu ditangkan enggau Pahang, Kelantan enggau Terengganu) sereta utara semenanjung (Penang, Kedah, Perak enggau Perlis) dalam bulan Februari enggau Mac 2014.
Manggai bulan Mac 2014, serata sitak menua di Semenanjung Malaysia disediaka enggau B5 nyengkaum stesyen minyak, pengawa berikan enggau ‘skid tanks.
Perintah nengah MPOB melanja CAPEX, iya nya 20 perengka guna ti begunaka biodiesel di depot petroleum diatu kena B5 di Semenanjung Malaysia.
Naka ke diatu, program B5 di kerembaika ngagai Malay- sia Timur ke mungkur Sabah, Sarawak enggau WP Labuan, alai 15 perengka guna ngena proses biodiesel bisi digaga.
“Iya dijangka tembu entara bulan November ngagai Disember 2014. Berindik ari tu ila, penguna domestik biodiesel B5 dijangka deka ngena 0.5 juta ton setaun.
“Ke diatu, perintah ngambi atur nambah takar champur biodiesel ari 5 persin ngagai 7 persin. Ngepunka B7 dijangka ulih digaga entara bulan November-Disember 2014. Reti nya Sabah Sarawak enggau WP Labuan ngelaung B5 lalu terus ngena B7. Penguna biodiesel B7 dijangka manggai 0.7 juta setaun,” ku Uggah.
Diatu bisi 7 palan biodiesel minyak sawit gred biasa komersil digaga ngena teknologi MPOB, nyengkaum siti di Korea enggau siti di Thailand. Lalu siti agi di Bintulu deka dipunka dalam bulan tu.
Datai kediatu, bisi tiga buah palan biodiesel minyak sawit musim chelap komersil udah digaga di Malaysia.
Biodiesel minyak sawit digaga ari minyak sawit mata, enggau kerubung kering sawit digaga MPOB urung taun 1980.
Proses nya mandangka pengulih teknikal ba pengeluar biodiesel minyak sawit seruran nitihka pematut udah nganti diesel kenyau taun 1983 nyentuk 1994.