Awang Tengah: Ripot Auditor Besai pasal projek RTB ti enda mujur deka dikesilikka dulu
KUCHING: Menteri Pengatur Pemansang Pengeraja Asal enggau Rampa Menua II Datuk Amar Awang Tengah Ali Hassan (gambar) madah, iya deka mansik enggau silik ripot Auditor Besai ti bisi ngaitka pengawa audit ti dipejalaika entara Februari enggau Mei 2014, ke madahka atur mutarka projek di Sarawak baruh opis menteri nya enda mujur.
Di baruh opis menteri nya, sebengkah ari projek nya, Projek Nyeliahka Penusah Bah ( RTB) nitihka ripot Kepala Audit Menua Taun 2013 Siri 3 ti dibantai di Dewan Rakyat kemari, madahka projek RTB diperatika bedau nyapai tuju ke batang.
“Nganti aku macha ripot nya enggau silik dulu, baru aku madah ngagai kita (pemberita),” ku Awang Tengah madah maya dirandau penembu Aum Kunsil Nengeri Hari Kedua, Aum Kedua Renggat Ke-empat Kunsil Nengeri ( DUN) ke- 17 di DUN ditu, kemari.
Ripot nya madahka pansik ke silik agi ditemu enda digaga enggau silik taja pan penanggul ke pengabis balat bekaul enggau tanah nya udah ditemu, lalu ngujungka chara dikena ba kededua projek nya enda manah.
Tuju asal projek ngerumbak ngena belanja urung RM10.25 juta di Batang Rajang betunga enggau Pulau Kerto di Sibu kena mutarka penanggul ampuh bah enda mujur dijapai laban pengawa nyangkul nya enda dipejalai enggau betul, ku ripot nya.
Kelimpah ari nya mega, ripot audit ke enda mujur baruh opis menteri nya, pengawa audit ba Tanjung Manis Integrated Port Sdn Bhd (TMP) alai utang dagang kompeni nya diperatika bisi nambah lalu ba pengujung taun 2013, penyampau nya manggai RM3.65 juta.
Nitih ku ripot nya, kos operasyen TMP mega diperatika nambah 33 peratus dalam taun 2013 dibanding enggau taun sebedau nya, lalu penguntung kompeni enda nitihka atur wang.
Opis ‘Perbadanan Kemajuan Perusahaan Kayu Sarawak’ (PUSAKA) ngempu 100 peratus syer ba TMP dalam taun 2009, lalu Perintah Menua nuduh PUSAKA nyadi operator ke Lembaga Pelabuhan Tanjung Manis ke baru ditumbuhka kena bulan Julai 2012.
Pemerat pengawa TMP, iya nya bejalaika operasyen, ngatur pengawa sereta nyaga terminal Tanjung Manis kelimpah ari nyukupka pengatur penyangkai kapal di menua sereta nambahka aktiviti ngaga penyangkai kapal endur transit keluar masuk kapal ke menua tengah.