Pengawa bejual bebelika tanah NCR ulih dipejalaika entara raban Bumiputera aja
KUCHING: Berindik ari penetap Rang Undang-undang Kanun Tanah (Pindaan) 2014 dikemendarka Kunsil Negeri kemari, pengawa bejual bebelika Tanah Adat Bansa Asal (NCR) diatu ulih dipejalaika entara Bumiputera taja pan ukai datai ari menua ke sama.
Rang undang- undang nya dibantaika Sapit Kepala Menteri Datuk Patinggi Tan Sri Alfred Jabu Numpang ti madahka diatu sebarang pengawa betukar mindah pengempu tanah NCR ulih dipejalaika taja pan penyual enggau pemeli ukai datai ari menua ke sama.
“Semua pengawa bejual enggau bebeli tanah NCR tu deka bepanggai ba pemereti kededua penyual enggau pemeli lalu perintah nadai sangkut paut enggau nya,” ku iya.
Jabu mansutka pekara nya lebuh ti nyimpul rang undang-undang Kunsil Negeri Kanun Tanah (Pindaan) 2014 kemari maya Aum Kunsil Negeri kemari.
Berindik ari nya ku iya ti mega Menteri Pemansang Menua Pesisir, diatu tanah NCR ulih dikemajuka sereta pemansang di menua pesisir ulih chakah dipejalaika.
Iya madahka, ubah rang undang-undang nya nadai mai pengerugi ngagai raban bumiputera di negeri tu laban tanah ti dijual nya deka dikemansangka.
Lebuh ti bejuraika rang undang- undang tu mega madahka ADUN penyakal ti nempa provokasi engka enda meretika pasal ubah rang undang-undang nya.
“Sida engka enda meretika pasal ubah rang undang-undang tu ti enggau juluk deka ngemansangka tanah NCR ti tebal agi di menua pesisir. Diatu tebal agi tanah NCR tu bedau dikemansangka,” ku iya ti mega Menteri Betanam Betupi Moden.