Operasyen bersepadu JPJ dipejalai dikena nyidi kerita ti enda nitihka atur ti ditetapka

KUCHING: Sepenyampau 341 iti saman udah dikeluarka dalam timpuh seminggu operasyen bersepadu ti dipejalaika di serata nengeri tu kenyau ari 1 November tu tadi dikena nyidi kerita ti enda nitih atur ti udah ditetapka.

Pemesai Penyambung Kaul Opis Perengka Pengangkut ( JPJ) Sarawak Rogie Sani madah, tebal agi penyalah nya bekaul enggau lumur kerita, ke alai 234 iti saman udah dikeluarka lalu 91 iti saman ketegal ngena Strobe Light lalu 16 iti agi ketegal nguna High Intensity Discharge (HID).

“Dalam timpuh nyentuk ke 6 November sekumbang operasyen bersepadu nya dipejalaika, mayuh saman udah dirikod atas penyalah lumur kerita, Strobe Light enggau HID.

“Aku arapka orang ti beempu kerita ti ngena lumur kerita nitihka atur sereta ningkilka Strobe Light enggau HID ke dilekatka ba kerita sida laban operasyen bersepadu tu deka majak dipejalaika,” ku iya lebuh ke dikerandau pemberita kemari.

Penyampau kompaun ungkup penyalah lumur kerita ari baruh Kaedah 6 (7) Kaedah-Kaedah Kenderaan Motor ( Pendaftaran dan Pelesenan) 1959, deka dikompaun maksimum RM200 ngagai mutosikal bekuasa 250cc ke baruh lalu maksimum RM250 ungkup kerita enggau mutosikal bekuasa ngelui ari 250cc.

Ungkup penyalah Strobe Light enggau HID deka diukum nengah Kaedah 94 Kaedah-Kaedah Kenderaan Motor (Pembuatan dan Penggunaan) 1959, dikompaun maksimum RM250.

Ku Rogie, sepenyampau 347 buah kerita mega bisi ditemu ngena cheremin chelum ti enda nitihka atur ti ditetapka, tang sida semina dilalau ngerepakka nya.

Ku iya, penyampau kerita ke diperesa sekumbang operayen nya bisi 4,270 buah.