Pengajar enggau staf bukai diberi EKMLTK, BIP
Penyampau ti diberi ngagai pengajar, pengereja pengawa di sekula ulu entigis bepanggai ba penyauh
KUCHING: Perintah meri ‘ Elaun Khas Mengikut Lokasi dan Tahap Kesukaran’ (EKMLTK) tauka Bayaran Insentif Pedalaman (BIP) ngagai raban pengajar enggau staf bukai ti gawa di sekula ulu entigis.
Menteri Muda Pemansang Ruang Bilik enggau Pelajar Tumu Anak Mit Rosey Yunus madah, nya dikena ngelempungka pemerat raban nya ti kelalu jauh ari mengeri.
“Kena ngelempungka tating pengidup ti diasaika raban pengajar enggau staf bukai ti gawa di entigis, sida diberi EKMLTK tauka BIP ngambika ulih nyaup nampung pengurang fasiliti enggau infrastruktur di ulu entigis.
“EKLMTK diatu dibayar
“
Kena ngelempungka tating pengidup ti diasaika raban pengajar enggau staf bukai ti gawa di ulu entigis, sida diberi EKMLTK tauka BIP ngambika ulih nyaup nampung pengurang fasiliti enggau
” infrastruktur ba endur sida gawa. Rosey Yunus Menteri Muda Pemansang Ruang Bilik enggau Pelajar Tumu Anak Mit
nitihka penyauh sereta pemar sekula dilawa baka, Sekolah Pedalaman 1 diberi elawin RM500 sebulan, Sekolah Pedalaman 2 RM1,000 sebulan enggau Sekolah Pedalaman 3 diberi RM1,500 sebulan.
“Insentif BIP iya nya 10 peratus ari batang gaji pengereja pengawa nya. Lalu ngagai sida ke diungkupka rumah enda tetitihka kriteria Rumah Perintah di menua entigis, sida diberi Imbuhan Tetap Perumahan (ITP), “ku iya.
Rosey mansutka pekara nya dikena nyaut tanya ari Dennis Ngau (BN-Telang Usan) maya sesi tanya saut Aum Kunsil Negeri, kemari.
Nambahka nya Rosey madah, kena ngelempungka pemerat raban nembiak di sekula ulu entigis, perintah mega bisi nyendiaka bantu ke patut.
Entara bantu ke diberi ngagai nembiak iya nya ba Bantuan Khas Awal Persekolahan RM100 ke tiap nembiak ti diberi pun taun, bantu pemakai asrama tauka Rancangan Makanan Tambahan (RMT), Program Susu 1Malaysia (Sekolah Rendah), ku iya.
Nambahka nya ku Rosey, Bantuan Kumpulan Wang Amanah Pelajar Miskin (KWAPM) ti diberi ngagai Dasar Sedia Ada ( DSA) sepenyampau RM200 (Sekolah Rendah), RM300 (Sekolah Menengah) sereta bantu e-kasih sepenyampau RM700 (Sekolah Rendah) enggau RM900 ( Sekolah Menengah).
“Perintah deka terus chakah mantu nyemakakka raban nembiak enggau bala pengajar nengah perengka guna ti udah disediaka. Kitai arap bendar semia piak ulih neruska agenda transformasyen pelajar menua enggau penuh komitmen sereta dedikasi,” ku iya.
Kelimpah ari nya Rosey lebuh ti nyaut tanya bekaul enggau penanggul penyuntuk kuarters, bilik kelas enggau pengurang fasiliti di sitak Telang Usan, iya madah, dalam Langgur Pemansang Malaysia Ke-10 (RMK-10), sepenyampau 21 projek di sitak udah tembu lalu lapan projek benung dipejalaika.
“Dalam RMK-10, bisi 21 projek ba sitak Telang Usan enggau ungkus belanja sepenyampau RM56.1 juta udah tembu dipejalaika.
“Taja pia bisi lapan buah projek enggau ungkus belanja RM5.7 juta benung digaga nyengkaum Sk Long Moh, SK Long Jekitan, SK Long Laput, SK Long Anap, SK Long Seridan, SK Long Jeeh enggau SK Long Makabar.
“Kebuah projek nya laun dipejalaika nitih ti udah ditimpuhka laban bisi penanggul konteriktor. Taja pia dikena mutarka penanggul tu opis menteri udah ngetuka servis kontraktor nya sereta milih kontrak bukai nembuka projek nya,” ku iya.
Perintah mega ngagihka ungkup belanja kena ngemanahka pengerusak mit sepenyampau RM150,000 ngagai lapan buah sekula enggau kuarters pengajar di sitak Telang Usan, ku Rosey.
Entara sekula nya baka SK Long Panai, SK Long Bedian, SK Lio Mato, SK Long Banga, SK Kuala Tutoh, SK Benawa, SK Long Tungan enggau SK Long Makabar, ku iya.