Sufian: Raban nembiak baru dipinta ngemeratka pemanah jaku Kedayan
LIMBANG: Raban nembiak baru dipinta ngemeratka pemesai reti sereta pemanah jaku raban bansa Kedayan ke tebal agi enda dikeibuhka ketegal sungkak pemansang era globalisasi kemaya hari tu.
Ketuai Opis Kaunsil Pelilih Mit Limbang (LDC) Kaunsilor Sufian Mohat mansutka jaku nya lebuh bejadika ‘Enhancement of Kedayan Dialect Workshop ti keterubah diatur ditu ungkup rayat di pelilih menua nya empai lama ke udah.
Ku iya, program nya diatur dikena ngangkatka pemanah sereta meri basa ngagai jaku raban bansa di menua tu ke ngayanka pemanah adat bansa Kedayan.
“Program tu nagit raban nembiak baru bansa Kedayan ngambika sida ulih ngasaika pemanah adat sereta belajarka jaku raban bansa diri ke bekal pengidup dudi hari ila,” ku iya.
Sufian ke mega Sapit Chairman Gerempung Bansa Kedayan Limbang (PKL) madah, raban bansa Kedayan ke beruang bilik enggau bansa bukai enda tau nyadika pekara nya sebengkah ari penanggul belajarka jaku bansa diri.
Nangkanka nya, iya mantaika pengasa ati berindik ari raban nembiak baru bansa Kedayan ke enda ngembuan pengelandik bejaku dalam jaku Kedayan.
Program nya diatur begulai raban PKL enggau LDC.
Dulu ari nya, Kaban Kunsil Nengeri (ADUN) Bukit Kota, Dr Abdul Rahman Ismail ngarapka program bansa nya patut diteruska ba renggat ke bukai dikena ngetanka pemanah jaku raban bansa Kedayan sereta numbuhka sebengkah bup ke ngembuan tusun leka jaku di nengeri tu berindik ari bup nya ke bisi udah ditum- buhka raban bansa Kedayan di menua Brunei ke nguna jaku Melayu-Kedayan.
Sama bisi datai beserimbai enggau program nya, Chairman PKL, Pengulu Abdullah Osman, Pemancha Ali Jahar sereta Tuai Genturung Pendiau Kampung Sungai Poyan, Yusup Dullah.