Sekula Zon Tutoh Apoh berasai betuah bisi pengari rayat ke rajin baka Dennis

MARUDI: Chairman Kaunsil Lumba enggau Main Sekula Zon Tutoh Apoh, Jau Jok Jenggo, ngarika bala Kepala Pengajar sekula primari di zon nya, mantaika pengaga ati sereta meri terima kasih laban ke udah diberi belanja ari pengari rayat sida, Dennis Ngau.

Jau ke mega Prinsipal SMK K9 Long Bedian, Apoh madah, bala Kepala Pengajar ari Zon Tutoh Apoh meri besai terima kasih ngagai ADUN Telang Usan nya laban ti udah meri belanja nengah Projek Mit Pemasang Menua Pesisir (MRP) ngagai semua sekula di zon nya, enda ngira sekula primari tauka sekondari.

Ku iya, pemeri agih be- lanja nya ngelaika perintah nadai kala bechiping enggau sekula di menua pesisir, tang meri ungkup sereta pemerat ke sebaka enggau sekula di mengeri.

Jau Jok madah munyi tu pengudah nerima chek agih belanja ungkup sekula iya sepenyampau RM10,000 ari Dennis ba sebengkah pengerami ke diatur di Uma Beluvoh di Long Panai, apin lama ke udah.

Ku Jau Jok ke mega seiku ari pengajar veteran asal ari Long Panai, Dennis seiku pengari rayat ke rajin sereta komited enggau tanggungpengawa iya ba sitak Telang Usan,enda ngira bansa sereta ngemeratka pekara pelajar.

“Rayat di Telang Usan benasit bisi pengari rayat ke baka iya, agi biak, rajin sereta ngemeratka rayat lebih agi nembiak rebak baru lalu nentuka pemenyana pelajar sida.

“Iya mega nadai mandangka diri lelak sereta enda kala nulak enti dikangau ngulu tiap bengkah pengerami sekalika diatur ba sekula tauka genturung pendiau,” ku iya.

Bela bisi ba pengerami nyuaka chek nya, Sekretari Politik Kepala Menteri, Robert Laing Anyi; Ketuai Raban Bansa, Temenggung Elizabeth Deng, pengari Pemesai Opis Peljajar Pelilih Mit Baram, Jok Ipoi enggau bala Kepala Pengajar ari zon nya.