Tiga iti Pos Imigresyen di utara S’wak deka dikemanahka agi
Ketetiga palan nya nyadi pintu penama rayat menua tu empu, Brunei nyengkaum sekeda temuai ari menua luar
KUCHING: Tiga iti Pos Imigresyen muak ke utara Sarawak iya nya di Sungai Tujuh Miri, Tedungan enggau Pandaruan di Limbang deka dikemanahka agi lalu disikap enggau perengkaguna ke chukup.
Sapit Menteri Dalam Menua, Dato Sri Wan Junaidi Tuanku Jaafar madah, pengawa nya patut dikereja laban ketetiga palan nya nyadi pintu penama rayat ari Brunei nyengkaum sekeda temuai ari menua luar.
“Ba taun 2014, 6.4 juta iku orang udah pansut tama nengah ketetiga pos imigresyen tu. Kelimpah nyadi pintu penama rayat ari Brunei sereta ditengah rayat menua tu empu ti deka tama ke Brunei, ketetiga pos imigresyen tu mega nerima penatai bala temuai ari Jepun, Korea enggau China.
“Enti ketetiga pos tu enda disikap enggau perengkaguna ke chukup, pengurang nya tau endar meri pangka ngagai
“
Enti ketetiga pos tu enda disikap enggau perengkaguna ke chukup, pengurang nya tau endar meri pangka ngagai industri dagang temuai di nengeri
” tu. Dato Sri Wan Junaidi Tuanku Jaafar Sapit Menteri Dalam Menua
industri dagang temuai di nengeri tu,” ku iya.
Iya mansutka jaku tu lebuh dikerandau pemberita pengudah ngulu aum sentang Projek Ngemanah Tebing Tasik Kampung Buntal di Begunan Baitulmakmur ditu, kemari.
Wan Junaidi nambah, dikena nentuka pemanah tusun kereja ba ketetiga pos nya iya ngansak opis menteri ke dikuasa iya, ngiga sekeda belanja dikena ngelekatka sistem rangkaian fiber optik.
“Kami mega deka berunding enggau konsul besai Brunei ngambika jam ketetiga pos dibuka ulih dilanjar ngagai 24 jam enti dibandingka enggau semina 16 jam diatu. Kami nguji ngansak Brunei setuju enggau pinta nya”.
“Rangkaian fiber optik deka nentuka rintai nama orang ke tama ba tetiap iti pos imigresyen ke disambung enggau pos imigresyen ke bukai,” ku iya.
Atur tu ungkup pemaik semua ke lebih agi ngagai industri dagang temuai di nengeri tu, tandu iya.
Iya nambah, atur ke sama mega deka digaga ba tiap pos imigresyen di serata menua lalu nya nyengkaum di Tebedu enggau Serikin, muak ka selatan Sarawak.
Ngenang kaul ke sama, Iya mega ngansak opis menteri dagang temuai Sarawak ngiga kompeni pemeranak puku ngambika tau ngaga hotel (enda kurang 300 iti bilik) di Limbang.
Ku iya, hotel nya deka meri pengelantang tauka palan endur bemalam ngagai temuai ti datai nengah ketetiga pos imigresyen nya.