Skularhip Penyulut Pelajar (AKP) PV-ATM dibuka nyentuk ke 15 Januari tu
KUCHING: Anak kaban Veteran Angkatan Tentera Malaysia (ATM) Nengeri Sarawak ti nyulut dalam peresa perintah UPSR enggau PT3 taun 2014, diperansang minta Skularhip Penyulut Pelajar (AKP) Gerempung Veteran Angkatan Tentera Malaysia (PV-ATM) sebedau 15 Januari tu.
Yang Dipertuan PV-ATM Nengeri Sarawak Spencer Birai madah, skularship nya semina diberi ngagai anak veteran ATM ti udah nyadi kaban PV-ATM (ke dulu suba dikelala enggau nama PBTM).
“Veteran ATM Nengeri Sarawak ti udah nyadi kaban PV-ATM ke bisi anak ti teulihka penyulut dalam peresa UPSR enggau PT3 taun 2014 diperansang minta skularship AKP ke diatu benung tebuka lalu peminta patut dianjung sebedau tauka kena 15 Januari tu.
“Nyema ke anak kaban PV-ATM nitihka peminta ti udah ditetapka, sida tau datai ngambi pom enggau enda bebayar ngagai Opis Gerempung Veteran ATM (PV-ATM) ba Tingakat 1, Bn 208, Batu Kawa New Township.
“Penerang ke silik pasal skularship tu mega tau ditanya ngagai Entinggang ba lumur 082- 4566343 tauka 010- 8350240 maya jam gawa,” ku iya madah ngagai Utusan Borneo.
Ku iya, peminta ke ditetap ulih nerima Anugerah Kecemerlangan Lembaga Tabung Angkatan Tentera - Yayasan Warisan Perajurit ( AKP LTAT-YWP) ngagai sida ti peresa UPSR Taun 2014, iya nya patut bulih 5A, 4A 1B, tauka 4A 1C sereta enda tau enda bulih seiti A ba sabjek Bahasa Melayu ( Pemahaman/Penulisan).
Ngagai sida ti ngambi peresa PT3 ungkup taun 2014, enda tau enda teulihka abis nadai CGPA 50 mata enggau ke atas ari komponen PAJSK, lalu penyampau ke dibayar nya bepanggai ba penyulut nembiak ti dperatika nengah Pentaksiran Pusat (PP) nitihka penyampau subjek ti bulih A.
Sida ke ngambi PT3 nya enda tau enda bulih A sekalika dalam sabjek Bahasa Melayu lisan tauka betulis dikena nentuka ulih nerima bayar AKP LTAT-YWP, ku iya.
“Nambahka nya peminta ke patut dititih ti nentuka anak veteran ulih nerima AKP iya nya, veteran ATM enda tau enda nyadi kaban PV-ATM,” ku iya.