Abang Johari: Peminta DAP enda ngirauka ati PBB
SANTUBONG: Penemu penyakal ti minta Komiti Pengawa Bepilih ( SPR) ngemasukka polling district Market enggau Bazaar ke diatu dibaruh Kunsil Nengeri ( DUN) Padungan ngagai sitak ( DUN) Satok, enda ngirauka ati Parti Pesaka Bumiputera Bersatu (PBB) Pampang Satok ti megai sitak nya.
Kaban Kunsil Nengeri (ADUN) Satok, ti mega Ketuai pampang nya Datuk Amar Abang Johari Tun Openg madah, penemu nya nadai meri penanggul ngagai sitak ke dipegai iya laban menua tu endang menua demokrasi.
Taja pia ku iya, pemutus nya bepanggai ba pemutus SPR ti nentu sekalika patut tauka enda ngemasukka polling district nya ngagai sitak Satok.
“Aku enggai nimbal (pasal penemu sida penyakal nya) laban semua pengawa nya bepanggai ba pemutus ari SPR.
“Nyema SPR nerima penemu penyakal nya, kami enda irau sereta nadai meri penang- gul ngagai kami laban menua kitai tu demokrasi,” ku iya seraya nandu baru madahka pemutus nya dilempaika ba SPR.
Abang Johari ti mega Sapit Presiden PBB mansutka penemu nya lebuh dipinta nimbal bekaul enggau penemu penyakal ti madahka polling district Market enggau Bazaar patut dipasukka ngagai sitak Satok.
Apin lama ke udah, Chairman Parti Tindakan Demokratik (DAP) Nengeri Chong Chieng Jen mantaika langgur penemu ngagai SPR ngambi ngemasukka polling district Market enggau Bazaar ngagai sitak Satok.
Chong madahka SPR patut ulih berundingka penemu tauka perambu nya, awakka penyampau pengundi ulih sebela laban diatu penyampau pengundi Satok semina 13,580 iku enti dibanding enggau sitak Padungan ke ngembuan 22,873 iku pengundi.
“Kami DAP meri perambu ngambika polling district Market enggau Bazaar ke dibaruh Padungan dipasuk ke dalam sitak Satok, ngam- bika penyampau pengundi ulih sebela lalu ngujungka penyampau pengundi ba sitak urung 18,590 iku lalu Padungan 17,863 iku,” ku Chong apin lama.
Kelimpah ari nya Abang Johari lebuh ke ditanya, enti sema polling district Market enggau Bazaar ti tebal agi pengundi raban bansa China, sekalika nya bisi ngachau sukung tauka enda, ku iya,nya nadai penanggul.
“Nadai kebuah irau, laban enti kitai bediri minta pilih kitai enda tau enda bediri ke semua raban bansa,” ku iya.