SPDP ngining tiga iti sitak ba DUN ke baru diperambu

KUCHING: Presiden Parti Demokratik Progresif Sarawak (SPDP) Datuk Seri Tiong King Sing madahka parti nya tetap ngining kerusi baru baka ke udah diperambuka lebuh magi sitak garis menua, ke alai Komiti Pengawa Bepilih (SPR) udah mantaika 11 iti sitak baru ngambika dipeda mensia mayuh dalam kandang sebulan timpuh bantah ti diberi.

Tiong madah, parti sida (SPDP) deka baum sereta beratika dulu enggau kaban komponen BN bukai ungkup 11 iti kerusi baka ke udah diperambu nya.

“Kami deka nyadi parti ke ngaga pemutus pasal ungkup kerusi baru, ari ti semina meda aja. Dalam pekara tu, kami ngining tiga iti sitak ke diperambu nya,” ku Tiong.

Iya madah munyi tu ngagai The Borneo post, seraya madahka SPDP deka ngulu aum kunsil besai BN ba pekara magi kerusi baru, ari semina ngelakka kunsil ngaga pemutus nya kediri, baka ke bisi dibantaika kena Hari Satu tu tadi.

Lebuh ke ditanya sentang bagi sitak ke diining sida, Tiong madah, “Enti nitih,penuduk ke dalam kandang sitak parlimen ti dipegai parti patut diungkupka ngagai parti kami ”.

“Kami bisi ati ba Samalaju, ke mega dalam sitak parlimen Bintulu enggau Long Lama di Baram. Diatu aku nyadi penyandang pengari rayat ba sitak parlimen Bintulu, lalu Anyi Ngau nyadi Mandal presiden sereta Kaban Parlimen Baram”.

“Kami mega ngining Kabong ke dalam sitak Parlimen Saratok ti dipegai parti kami,” ku iya.

Tiong madah, taja pan penuduk nya diatu dipegai Tan Sri William Mawan, presiden Parti Tenaga Rakyat Sarawak (TERAS), tang enti nitih pengamat iya, sitak nya diempu SPDP, laban Mawan menang di sitak nya suba atas tikit SPDP, ke alai iya mengkang nyadi presiden suba.

Tiong ngarapka aum sentang sitak baru nya diatur enggau manah ngambi pulaika pemaik ngagai BN.