GLOMUS Camp 2015, pelasar pengemeran muzik mansik sereta bekunsika peneleba sentang muzik
SANTUBONG: Global Network for Higher Music Education (GLOMUS) Camp dikearap nyadika pelasar pengemeran muzik menua tu, mansik sereta ngulihka penemu enggau peneleba pasal muzik ari pemuzik di serata dunya.
Menteri Dagang Temuai, Datuk Amar Abang Johari Tun Openg madahka GLOMUS Camp nya mega ukai semina endur nempa kaul aja, tang nyadika endur ngiga penemu sereta pengelandik pasal kereban muzik.
Iya madah, nengah GLOMUS Camp nya mega pengemeran muzik di Sarawak ulih bekunsika pemanah muzik, kereban muzik enggau bala pemuzik ari menua tasik, baka pemanah bunyi Sape ti udah dikelala dunya.
“Aku ngarapka GLOMUS Camp tu nyadika pelasar ngagai kitai ke lebih agi pengemeran muzik, lalu ukai semina mansik sereta nguji ngiga asil ari muzik aja, tang kitai mega patut sama belajar tauka mansik nama ti mai pemanah ngagai mensia sereta rampa menua.
“Bekaul enggau kereban muzik, kitai bekunsika penemu enggau pengelandik ngemansangka kereban muzik ngambika kitai amat ulih berati sereta meretika pemesai guna kereban enggau muzik ke ulih nempa pemaik entara kitai mensia,” ku iya.
Abang Johari ti mega Menteri Pemansang Pengawa Berumah, mansutka jaku tu lebuh ti bejaku sereta bejadika GLOMUS Camp 2015, ti diatur ba Panggung Budaya, Kampung Budaya Sarawak ditu, pagi kemari.
GLOMUS Camp diatur dua taun sekali lalu keterubah diatur di menua ukai Afrika, ke alai Sarawak dipilih endur ngatur dalam taun 2015. Sebedau tu GLOMUS Camp kala diatur ba Mozambique (2009),Ghana (2011) enggau Tanzania (2013).
GLOMUS Camp 2015 ti berambaika leka jaku ‘Inclusion, Collaboration and Global Resposibility in Arts Education’ diatur 10 hari berengkah ari 9 nyentuk 18 Januari ba Kampung Budaya Sarawak ti bejurai, sereta ngatur woksyop pasal muzik, tanda, teater sereta ke bukai ti bekaul.
Tuai rumah GLOMUS Camp 2015, iya nya Fakulti Muzik Universiti Teknologi Mara (UiTM) sereta UiTM Sarawak nengah saup GLOMUS.
Tuju kem tu diatur endang dikena ngempuruka pengemeran muzik enda ngira bansa muzik enggau penatai, ngambika sama ulih ngangkatka adat enggau main asal, bekunsi penemu enggau pengelandik sereta ke bukai.
GLOMUS Camp 2015 digulu 120 iku pesereta ari 21 buah menua baka Finland, Denmark, Tanzania, Mali, Australia, Nepal, Sweden, Brazil, China, Netherland, Singapura, Estonia, France, Ghana, Mozambique, Afrika Selatan, Palestine, Egypt. Syria, Afghanistan enggau Malaysia.
Kelimpah ari nya, Rektor UiTM Sarawak Prof. Dato Dr. Jamil Hamali lebuh bejaku ba pengerami nya mega ngarapka mayuh agi ngatur kerejasama enggau organisasyen bukai ngambika ulih ngelaku sereta nambahka peneleba dalam raban bansa.
“Ngatur pengerami tauka program baka GLOMUS Camp tu ulih mantu ngelakuka Sarawak ke mega sebuah nengeri ke nyelai ti likun diuam mayuh bengkah pupu raban bansa” ku iya.
“Kami UiTM temegah ati ngelakuka mayuh macah adat enggau main asal sereta pesaka Malaysia ke lebih agi Sarawak,” ku Jamil.
Penerang silik pasal GLOMUS enggau kem tu tau dipeda ba http://www. glomus.net enggau http:// music.uitm.edu.my.
Bela bisi ngulu pengerami nya kemari Faculty of Music Dean UiTM, Assoc. Prof. Dr. Ramona Mohd Tahir, Rektor of Royal Academy of Music Aarhus/ Aalborg ( RAMA) Denmark Thomas Winther enggau bala bukai.