Gawong ngandalka diri bulih PBR ari perintah
BINTANGOR: Agi ngandalka nerima Projek Bantu Rumah (PBR) ari perintah, Gawong Chendan, 34, seiku peranak Rumah Suring, Sungai Tulai ditu mengkang ngarapka opis ti bekaul ngemujurka juluk ati sida sebilik.
Gawong sebedau tu kala mantaika sebana iya nengah surat berita madahka diri suntuk ramu kelimpah bepenanggul ba penatai pemisi dikena ngentak nampung rumah panjai baru ketegal rumah panjai sida udah angus maya taun 2008 suba.
Maya ke dirandau pengarang berita kemari, iya madah, sida menyanak semina ulih ngentak rumah mit ba ujung bilik sida serumah pengudah beberapa taun temawai lama angus.
“Sebedau tu mega aku kala minta saup kami serumah nguji minta pom projek nya tang nyentuk ke diatu aku empai nerima pom nya,” pia ku iya madah.
Iya madah, rumah alai sida diau diatu bangat mit lalu enda umbas alai sida menyanak diau.
“Beramu suba pan semadi disaup bala bukai ditu.
“Enti ngaji tauka meli ramu bekenaka puku ti besai. Tambah mega maya nya suba aku semina gawa kapal berikan ti begaji mit nekul juluk ati deka nampung orang bukai,” ku iya madahka baru.
Sida sebilik nyengkaum dua iku anak indu iya lalu seiku udah besekula semina bepanggai ba penatai pemisi ari iya ke gawa nyadi tukang kebun ba sekula rumah panjai sida.
Taja baka nya ku Gawong iya bisi pengirau ati nangika putus pengawa laban gawa nengah chara konterik.
Ketegal pekara nya ku iya madah, sida sebilik andal amat bulih Projek Bantu Rumah (PBR) ari perintah baka bala bukai.
“Ngelama tu kami sebilik ngining meda orang bukai mujur bulih PBR tang aku enda nemu sapa bagi dilawa, baka ni chara minta pom,” ku iya madah baru.
Gawong mega enda nyalam iya nangi ngenang pengidup sida sebilik ke diatu tau nekul pemujur anak iya dua iku nya lebih agi ba pekara pelajar jemah ila.
Maya ditanya senentang bantu RM100 ari perintah ngagai nembiak sekula, ku iya, bantu nya tau bendar ngelempungka belanja bebelika kereban sekula anak.
“Terima kasih ngagai perintah laban bantu baka tu beguna bendar ba orang ti kurang penatai pemisi.
“Ari bantu tu mega, ba penemu aku, tau meri pengeransing ngagai bala apai indai lebih agi baka kami di menua pesisir chakah agi nyengulaka anak,” pia ku iya madah.