Jerip andal BN ulih menang ba DUN Serembu enggau Mambong
KUCHING: Pemutus numbuhka sitak pengawa bepilih kunsil nengeri ke baru ari baruh perambu atur baru Komiti Pengawa Bepilih Besai ( SPR) nadai meri sebarang penanggul bekaul enggau sukung rayat ngagai perintah Barisan Nasional (BN) ba sitak ke bisi ditu iya nya Kunsil Nengeri (DUN) Bengoh.
Kaban Kunsil Nengeri (ADUN) Bengoh Datuk Dr Jerip Susil madah, tajapan penuduk tauka kerusi baru ditumbuhka ungkup pengawa bepilih kunsil nengeri ( PRN) ti deka datai, BN andalka diri ulih menang ba kededua kerusi ke diperambu iya nya DUN Serembu sereta DUN Mambong seagi agi parti BN milih chalun ke ngembuan penau menang ba sitak nya.
“Serembu enggau Mambong ditumbuhka asil ari sebengkah kerusi ke bisi sebedau tu iya nya Bengoh ke nyadi palan tauka kuta ngagai BN.
Aku pechaya, taja kala charut, tang kededua kerusi baru tu deka mengkang baka nya,” ku iya madah ngagai Borneo Post ditu, kemari.
Jerip ke mega Menteri Muda Pengerai Rama madah, iya chukup pechayaka kededua kerusi nya ulih dipenggi BN enggau syarat BN ngembuan chalun ke betul sereta ngembuan penau besai menang.
Nengah pengawa ngaga baru garis sentara sitak kunsil nengeri, 11 buah kerusi tauka sitak baru udah mujur ditumbuhka di nengeri tu.
Parlimen Mambong diubah nama ngagai Puncak Borneo ke mungkur tiga sitak DUN iya nya Serembu, Mambong (Bengoh nama asal) enggau Tarat.
Ari tiga buah kerusi nya, Mambong entara sitak ke ngembuan penyampau pengundi ke pemadu mayuh.
Nitihka penerang, Serembu ngembuan 23 palan muai undi ke ngundan 9,677 iku pen- gundi, Mambong (28 buah palan muai undi ke ngembuan 16,803 iku pengundi sereta Tarat (22 buah palan muai undi) enggau 16,374 iku pengundi ba SUN nya ke mandangka kesemua penyampau pengundi ba Parlimen Puncak Borneo (asal Parlimen Mambong) iya nya urung 42,854 iku pengundi.
Lebuh ditanya sekalika iya deka bediri ngarika sitak Serembu tauka Mambong, Jerip madah enti agi diberi peluang, iya deka terus bediri ngarika sitak nya tang utai nya bepanggai ba pemutus Kepala Menteri ke nentuka pekara nya, pia ku iya.
“Ba aku, nadai nenama penanggul laban kededua sitak nya dibungkur sitak ke dipegai aku.
“Tang aku enggai bejaku panjai, awakka Kepala Menteri nentuka pekara tu sereta ngagai pemutus nitihka pematut.
“Pemadu beguna iya nya, BN menang. Aku chukup arap ka Kepala Menteri ngembuan saut ungkup tanya enggau pekara tu,” ku iya nandu.
Empai lama ke udah, Komiti Pengawa Bepilih (SPR) udah mutuska 11 buah kerusi DUN baru ditumbuhka ke alai diatu nengeri Sarawak ngembuan 82 buah sitak DUN iya nya nambah ari 71 sitak ngagai 82 kesemua.
Asil ari pemutus sitak baru nya, bansa Bidayuh ngembuan dua buah sitak DUN ke baru iya nya DUN Serembu sereta DUN Triboh, ke alai kededua sitak nya diau ari baruh Parlimen Mambong (diatu ditukar nama ngagai Puncak Borneo) sereta Parlimen Serian.
Naka ke diatu, kerusi Bidayuh dipegai ADUN Opar, Tasik Biru, Bengoh (diubah ngagai Mambong), Tarat, Tebedu sereta Kedup.
Entara sitak DUN baru ke udah ditumbuhka iya nya N.13 Batu Kitang, N.17 Stakan, N.18 Serembu, N.23 Triboh, N.26 Gedong, N.40 Kabong, N.57 Tellian, N.63 Selirik, N.66 Murum, N.70 Samalaju enggau N.78 Long Lama.