Kes denggi di Morsjaya raya
MIRI: Palan Komersyel Morsjaya ke bepalan ba Jalai Airport Miri diatu betapi enggau penusah sakit denggi ke majak raya kenyau ari bulan seiti nyin kemari.
Urung 34 buah kes bisi diripotka nyadi dalam bulan Disember taun nyin tadi. Ari penyampau nya, 10 buah kes diripotka nyadi ujung bulan Disember nyentuk kemari.
Nitihka pansik ke bisi digaga Opis Pengerai, kebuah pekara tu nyadi iya nya berindik ari peranak ke nguan endur nya enda nyaga pemeresi kandang endur sida diau sereta enda ngemeratka pengelikun ke alai mayuh endur ba palan nya nyadi tansang nyamuk betelu.
Mayuh endur nyamuk betelu dipeda chukup kamah sereta ditejuka pia aja. Nya nyengkaum kontena, pasu bungai, tong puang, tayar entukar, pam agu sereta mayuh agi perengka bukai ke nimbun ai.
Ulah ke baka nya nyadika kebuah penyakit denggi majak ngelekai ba palan nya.
Kelimpah ari nya, premis ke bekunchi sereta nadai orang nguan mega nyadi palan alai nyamuk aedes betansang.
Lapan buah palan buka ke mega dikelala ngembuan potensi tinggi alai nyamuk aedes betansang iya nya Jalai Nasturium, Jalai Allamanda, Jalai Calycina, Jalai Cosmo, Happy Garden, Taman Pin Fook, Taman Da Sing sereta Taman Wah Shin.
Datuk Bandar, Lawrence Lai lebuh ditanya madahka iya ngemeratka pekara nya sereta minta semua peranak ke diau ba palan ke ulih dirampit igi penyakit tu seruran nyaga pemeresi palan alai diau awakka likun ari nyamuk betansang.
Kelimpah ari nya, sida mega dipinta ngemunaska nyamuk nya nengah chara ngerachun sereta ngemunaska palan ke nakung tauka nimbun ai ke ulih nyadi nyamuk betelu.
“Lebuh maya musim pengujan, kes ke bekaul enggau demam denggi ditu diripotka majak ngelekai iya nya dua kali ganda enti dibandingka enggau taun seiti nyin kemari. Kitai deka meda semua peranak sedarka pekara tu sereta meri kerejasama sida dalam ngemusaka penusah tu,” ku Lawrence.
Iya minta semua peranak enggau orang dagang ba palan nya ngemendarka piak nguasa adat bejalaika pansik ba kandang alai sida diau.
Ku tambah iya, Opis Pengerai Miri deka terus bejalaika pansik di Morsjaya dikena ngemunaska pengelekai penyakit nya.
“Kena Hari Minggu tu, kitai deka ngatur sebengkah pengawa beripai ke diadang deka berengkah urung pukul 7 lalu tembu urung pukul 9 pagi. Kitai mega deka bejalaika pengawa nyembur asap dikena nyeliahka ari ditepan penyakit nya,” ku iya.