Arapka BN ngenuluka parti, chalun ke disadang menang ba perambu DUN ke baru
Ngambi ulih ngeringka agi BN napi Pengawa Bepilih Kunsil Nengeri ke deka diatur dudi tu ila, ku Rayong
KUCHING: Kaban Kunsil Nengeri Engkilili, Dr Johnical Rayong Ngipa arapka Barisan Nasional ( BN) ngengkahka parti enggau chalun ke ulih menang ba perambu 11 iti sitak kunsil nengeri ke baru.
Ku iya, chalun disadang ulih menang nya nyengkaum bala ari United People’s Party (UPP) enggau Parti Tenaga Rakyat Sarawak (TERAS).
“Aku arapka 11 iti sitak Kunsil Nengeri ke baru nya diberi ngagai chalun ti disadang ulih menang ngambi ulih ngeringka agi BN ba Pengawa Bepilih Kunsil Nengeri ke dudi tu ila,” pia ku iya madah ngagai The Borneo Post ensanus.
Rayong, ke mega kaban komiti UPP madahka penambah sitak nya besai amat reti ngagai rayat ke lebih agi ari sukut pemansang enggau penegap politik.
“
Awakka bala ketuai BN ke ari baruh pegai Kepala Menteri,Datuk Patinggi Tan Sri Adenan Satem ngaga pemutus parti sereta chalun ke patut ba sitak nya.Kami ari UPP pechaya BN enggau Kepala Menteri deka ngemeratka chalun ti disadang ulih menang sereta mega berundingka UPP enggau Teras dalam
” pekara tu. Dr Johnical Rayong Ngipa Kaban Kunsil Nengeri Engkilili
“Awakka bala ketuai BN ke ari baruh pegai Kepala Menteri, Datuk Patinggi Tan Sri Adenan Satem ngaga pemutus parti sereta chalun ke patut ba sitak nya.Kami ari UPP pechaya BN enggau Kepala Menteri deka ngemeratka chalun ti disadang ulih menang sereta mega berundingka UPP enggau Teras dalam pekara tu,” ku iya seraya madahka pekara nya ulih nentuka BN menang magang ba semua sitak baru nya.
Komiti Pengawa Bepilih (SPR) apin lama ke udah, merambu numbuhka 11 iti sitak Kunsil Nengeri baru ke lalu nambah penyampau sitak ngagai 82 iti dibanding enggau 71 iti sebedau tu.
Sitak baru ke diperambu nya baka Batu Kitang, Stakan, Serembu, Triboh, Gedong, Kabong, Tellian, Selirik, Murum, Samalaju enggau Long Lama.