Pintu baraj Sungai S’wak dibuka dua kali sehari maya musin pengujan

KUCHING: Pintu baraj Sungai Sarawak deka dibuka dua kali sehari maya musin pengujan tu dikena bejaga sereta ngurangka risiko bah nyadi.

Kontroler LSS William Jinep madahka, pintu baraj nya deka dibuka maya ai pasang dikena muai ai ti kelalu mayuh sereta nurunka tikas ai nyentuk ngagai 7.5 meter.

Nitihku iya, chara nya udah dipejalaika kenyau ari bulan Disember nyin tadi lalu diatu mengkang dipejalai ke lebih agi maya ujan bangat ba kandang ulu.

“Kami deka muka pintu baraj dua kali sehari maya ai pasang lalu nurunka iya ngagai tikas 7.5 meter maya musim pengujan tu.

“Ngelama tu (enti ukai musim pengujan), kami nurunka tikas ai nyentuk ngagai 8.5 meter seraya meri jalai ngagai bot di sungai nya,” ku iya lebuh ditelefon Utusan Borneo ditu, kemari.

Bejaku baru william madahka LSS ngembuan sistem penesau ampuh bah ke diri empu iya nya Stesyen Telelemetri, ti disikap ngena Sistem Penesau Pemun Ampuh Bah ti ngeluarka bunyi siren nyema tikas ai datai ba tikas ti kelalu ngirauka.

Iya madahka bunyi siren nya nesau ke lebih agi ngagai peranak menua ti diau semak enggau sungai ngambika pindah ngagai endur ti likun.

“Siren tu deka bebunyi nyema tikas peninggi ai datai ba tikas ti balat ngirauka iya nya 10 meter, ke alai sida patut pindah.

“Taja pia kami patut minta pemendar ari Komiti Pengatur enggau Bantu Penusah Ngenyit Nengeri pasal pekara nya,” ku iya.

Bisi 18 Stesyen Telelemetri ti disikap ngena Sistem Penesau Keterubah Pemun Ampuh Bah udah diuji dikena nentuka iya seruran ulih dikena.

Sistem nya deka bebunyi nyema ai manggai ba tikas ke tinggi sereta enda selamat, nesau ngambika mensia mayuh pindah ke alai penerang nya lalu dikenataika ngagai bilik operasyen baraj.