Paul Igai: SPDP deka mansik rintai nama pengundi ba perambu sitak DUN ke baru

KUCHING: Parti Progresif Demokratik Sarawak (SPDP) deka bejalaika pansik sentang rintai nama pengundi dalam perambu sitak Kunsil Nengeri ke baru.

Pansik tebal agi deka dipejalaika ba semua kandang endur ti dalam kuasa parlimen ti diungkupka ngagai parti.

Mandal Presiden SPDP, Datuk Paul Igai madahka pansik nya diguna pengudah Komiti Pengawa Bepilih ( SPR) mantaika perambu numbuhka sitak baru ti deka diperebut maya pengawa bepilih ti deka datai.

Ku iya, pansik nya patut dipejalai sebedau parti ulih ngenataika petisyen ngagai ketuai besai Barisan Nasional (BN) Nengeri.

“Sebedau kami netapka pemutus, kami deka nentuka rintai nama pengundi ba tetiap sitak ti bisi kaul enggau kami. Kami patut nemu rintai nama pengundi ba tetiap sitak sereta mega penyampau pengundi baru ba sitak nya,” ku iya.

Igai mega madah pansik mungkur pengawa beratika pemindah pengundi ngagai sitak bukai ketegal atur pemansang ke nyadi.

EC udah mantaika perambu 11 sitak pengawa Kunsol Nengeri baru iya nya sitak Batu Kitang, Stakan, Serumbu, Triboh, Gedong, Kabong, Tellian, Selirik, Murum, Samalaju enggau Long Lama.

Ku Igai, bepelasarka pan- sik ti keterubah parti ngasai engka bisi ubah nyadi ba sekeda sitak berindik ari pemindah pengundi dalam timpuh tiga ngagai enam bulan tu.

Entara sitak ke semak enggau endur pekara nya nyadi iya nya Selirik, Baleh, Kemena, Jepak enggau Samalaju.

“Ambika chunto ba sitak baru Samalaju, pemansang ke nyadi ba kandang menua nya tau matak pemindah pengundi. Tu meh bengkah pekara ke patut diperunding enggau silik sebedau netapka pemutus,” ku iya.

Igai madah pansik ba sentang pekara nya disadang tembu dalam timpuh 2 minggu.