STU muji, BKAP1M diberi tumu

SIBU: Serakup Pengajar Sarawak (STU) nerima manah atur perintah ti meri tumu Bantuan Khas Awal Persekolahan 1Malaysia (BKAP1M) RM100, dikena ngelempungka tating belanja apai indai nyerumba sekula ti deka dibuka baru enda lama agi.

Presiden STU Jisin Nyud madah, bantu sekula nya beguna amat sereta endar besai reti ngagai ruang bilik ti kurang penatai pemisi, ke lebih agi dikena meli perengka sekula.

“Atur perintah ti meri bantu tu manah amat laban ulih ngelempungka tating be- lanja apai indai tauka penyaga. Aku pechaya Opis Pelajar Nengeri nengah Opis Pelajar Bagi Menua enggau sekula udah meri bantu nya ngagai nembiak ke lebih agi ti kena tasah ampuh bah.

“Ruang bilik ti kena tasah ampuh bah nya beguna amat ke bantu nya baka dikena meli baju sekula sereta nyilih bup anak sida ke udah rusak ketegal ampuh bah,” ku iya lebuh dipinta meri penerang iya bekaul enggau bantu nya.

Ku Jisin, kenyau ari taun 2013, bantu nya ukai semina dianti nembiak tang mega ruang bilik ti kurang penatai pemisi.

“Kitai benasit amat bulih bantu ari perintah. Enti bantu nya diberi kenyau ari suba mayuh orang bulih penguntung ari bantu nya,” ku iya.

Berebak enggau tu Jisin madahka diri enda lantang ati laban bisi sekeda apai indai ti salah chara ngena duit bantu nya.

Aku ngarapka apai indai ngena bantu RM100 tauka bantu bukai baka Kumpulan Wang Amanah Pelajar Miskin (KWAMP) enggau chara ti betul baka meli perengka sekula anak, ku iya.