Nembiak rebak diatu patut ransing agi belajar laban mayuh bengkah bantu diberi perintah
PULAU BRUIT: Rebak ke maya hari tu patut berasai untung sereta pintar beratika genap perengka ke udah diberi perintah Barisan Nasional (BN).
Kepala Sekretari Politik Kepala Menteri, Abdullah Saidol madah, nyema dibanding enggau utai ke diasaika rebak diati enggau rebak dulu sibna, rebak diatu manah agi nasip laban perintah udah mayuh nyendiaka mayuh bengkah bantu ungkup sida.
“Nya alai, patut amat rebak diatu nguna semua perengka nya enggau memanah.
“Lebuh kitai beratika pemeri nya, kitai enda ulih beratika pennyampau bantu nya tang utai ke patut diperundingka kitai iya nya nama kebuah bantu nya diberi.
“Chunto iya, bantu tumu dikena besekula diberi perintah ngagai genap nembiak sekula di menua tu, lalu tuju iya dikena nulung bala apai indai sereta enda ngemerat tating belanja sida dikena meli kereban sekula bala anak,” ku iya.
Abdullah madah munyi nya rambau Program Nyuaka Bantu Kantung Sekula Yayasan Rakyat Malaysia, ditu, empai lama ke udah.
Kenu ku Abdulah, ketuai perintah BN nemu ungkus belanja ke majak besai balat nating pengidup rayat ke maya hari tu.
Nembiak diatu chukup untung. Sida nerima mayuh bengkah bantu. Nama utai ke diasai sida diatu nadai diasai orang dulu suba.
“Tambah mega, nengah bantu nya sida ulih numpu penuh ngagai pekara pelajar,” ku iya.
Abdullah ti mega Kaban Kunsil Nengeri (ADUN) N36 Semop madah, pekara pelajar nyadi saham ke pemadu beguna sereta enda tau diiarka bala apai indai.
Nengah perengka ke bisi disediaka perintah ke maya hari tu ku iya, bala apai indai enda ulih nyadika penanggul belanjai nyadika penekul alai nganjung anak sida ke sekula.
“Berebak enggau nya mega kitai deka meda piak sekula, ngerapitka kaul enggau bala apai indai lebih agi nentuka Gerempung Apai Indai enggau Pengajar (PIBG) pelasar alai ngerapitka kaul kededua piak.
“Kitai mega deka meda dudi hari, piak sekula ulih ngatur sebengkah licha ungkup bala apai indai sentang perambu ke deka dipejalaika sida dikena nyapai penyukut nembiak ba sekula ungkup taun tu,” ku Abdullah.
Ba pengerami nya bisi lapan buah sekula ari adap ke utara sitak Pulau Bruit bisi datai.