Dua pintu rumah dituju tanah tusur
KAPIT: Sebengkah penusah tanah tusur bisi nyadi ba belakang begunan Opis Kaunsil Pelilih Menua Kapit ke bepalan di Jalai Bukit Goram tumu pagi Hari Empat tu tadi ke udu ngeruga pengelikun dua pintu rumah ke dipenggi Bunyaum Salang enggau Mohd Faizani ke mega staf pengereja pengawa opis nya.
Kenu ku Bunyau ke mega seiku pembantu penerit adat opis nya madahka, iya bisi tedinggaka munyi utai beduru urung pukul 3 pagi datai ari belakang rumah.
“Lebih aku tedani pengudah ninga munyi inggar ba belakang rumah, aku chukup tekenyit meda tanah nyau tusur ari belakang dapur. Berindik ari penusah nya, dapur kami mega kena tuju tanah tusur nya,” ku Bunyau.
“Pagi tu tadi, aku udah ngeripot pekara tu ngagai piak pengatur pengawa opis sereta Opis Pengerara Api enggau Penyah Penusah bekaul enggau pekara tu,” ku iya.
Iya madahka nyawa sida sebilik agi mengkang betapi enggau sebarang penusah ke lebih berat berindik ari penusah nya, lebih agi diatu benung musim landas.
Kenu ku iya, penusah tanah tusur nya nyadi ketegal hari berunggu ujan kenyau lemai Hari Tiga tu tadi nyentuk ke seharitu.
Kelimpah ari nya, iya madahka diri chukup rugi ketegal mayuh kereban ke beguna rusak dituju tanah nya tusur nyengkaum beberapa iku manuk iya mati, langkau manuk pan runtuh sereta kebun sayur ba belakang rumah iya mega rusak ditabanka tanah tusur.
Tang nadai sebarang penusah bebadi bisi diripotka nyadi.
Nitihka rikod, penusah tanah tusur endang seruran nyadi ditu kelebih agi lebuh maya musim landas ke semampai ngujungka tanah tusur.
Entara palan bukai ke bisi dituntung penusah tanah tusur ditu iya nya ba kilometer 6 Jalai Selirik ( entara begunan flat Kentucky Fried Chicken(KFC) enggau Federal Medical Villa) ke diripotka nyadi urung 18 November taun 2013 suba ke naban sereta ngemutuska jalai besai ke chukup beguna ngagai peranak menua nya.
Penusah tanah tusur ke pemadu besai nyadi ba bulan Julai 2007 suba ba Kampung Cina ke alai endur nya bepalan ba baruh begunan tinggi telekomunikasyen sepiak kiba Jalai Airpot.
Berindik ari penusah nya, peranak ke diau semak enggau endur nya betapi enggau penanggul ke chukup besai.