Bansa Dayak patut ngubah runding ke lama
Kitai muntang nyapai pemansang baka bansa bukai enti kitai ulih ngubah runding ke lama: Harden
SRI AMAN: Raban bansa Dayak di nengeri tu patut ngubah runding enggau pikir dalam semua pekara ke bekaul enggau pengidup enti deka muntang nyapai pemansang, pia ku Menteri Muda Pemansang Menua Pesisir enggau Pengawa Berumah, Datuk Francis Harden Hollis.
Kenu ku iya, nyerumba pemansang dunya ke diasaika semua raban bansa kemaya hari tu, bansa Dayak patut lebih sikar berunding sereta besemekih enggau bansa bukai ngambika ulih meri pemansang ngagai menua tu.
“Ubah runding lama ngagai runding ke baru ngambika bansa Dayak ulih nyingkang
“
Berindik ari pemansang kemaya hari tu, pendiau kitai patut diiri enggau mayuh pengelandik dalam mayuh bengkah bidang. Anang bepanggai ba sebengkah
” bidang aja. Datuk Francis Harden Hollis Menteri Muda Pemansang Menua Pesisir enggau Pengawa Berumah
mansang sebaka enggau bansa bukai.
“Berindik ari pemansang kemaya hari tu, pendiau kitai patut diiri enggau mayuh pengelandik dalam mayuh bengkah sektor. Anang bepanggai ba sebengkah bidang aja,” ku tandu iya.
Harden ke mega Kaban Kunsil Nengeri ( ADUN) Simanggang mansutka jaku nya lebuh bejadi sebengkah awak beserimbai enggau pengerami makai lemai ‘Jiran Mesra Keluarga Bahagia’ ke diatur Komiti Pemansang enggau Pengelikun Genturung Pendiau ( JKKK) Taman Nanang enggau Munggu Sabun di sebuah restauran tebilang ditu, malam kemari.
Ku iya, bansa Dayak patut bechuntoka bansa China enggau Melayu ke udah jauh mansang dalam mayuh bengkah bidang kelebih agi pengawa bedagang.
Kelimpah ari nya, Francis mega ngelalau rayat ngambika seruran ngembuan runding positif nyukung semua perambu enggau dasar pemansang ke udah dilanggur perintah ngambika nengeri tu enda jauh tinggal pemansang ari menua bukai dalam awak pemansang.
Ku iya, sukung ke tegap ari rayat ari mayuh komponen parti baruh perintah Barisan Nasional (BN) sereta rayat pupu bansa chukup beguna dikena ngenanka pemansang ke udah diperambu sereta mujur dipejalaika.
“Perintah chukup begunaka sukung ari semua rayat di nengeri tu. Enti nadai sukung, semua program pemansang ke udah dilanggur deka puntan.
Nya alai ku iya, rayat patut lebih pintar milih pengari rayat ke ulih meri pengelantang ngagai rayat sereta ulih ngenataika pemansang enda ngira sebarang alai sekalika di mengeri tauka menua pesisir.
“Diatu, rayat di nengeri tu udah sedar sereta inginka pemansang ke enda nemu putus. Berindik ari nya, sukung ke tegap ari rayat ngagai perintah BN nya jalai ke chukup patut dikemeran,” ku tandu iya.
Sama bisi datai ba atur pengawa nya, Kaban Parlimen Sri Aman, Masir Kujat, Sapit Raban Nembiak Parti Sa’ati Rayat Sarawak (SUPP) pampang Simanggang, Patrick Micheal Malajin, Chairman JKKK, Peter Finch, Chairperson Biro Indu, Rebecca Sambai, bala tuai raban bansa sereta raban komiti JKKK ke bukai.
Beserimbai enggau pengerami nya, Harden madahka diri bisi ngungkupka bantu beungkus RM5,000 ari perintah ngagai JKKK, RM3,000 diungkupka ngagai Biro Indu rumah panjai nya seraya Masir bisi ngungkupka pemeri RM3,000 ngagai JKKK rumah panjai nya.