Kemanahka tikas tusun pengawa neritka adat

KUCHING: Kepala Menteri Datuk Patinggi Tan Sri Adenan Satem (gambar) enda lantang ati enggau pengelemi tusun pengawa raban penerit adat sentang penama orang ari menua luar ke nengeri tu.

Bejaku ba pengerami ngintu Hari Kampung Entarabansa Renggat Nengeri 2015 kemari, Adenan madah taun kitai ngintu pemujur ngemunas sekeda penyalah ngereja batang nadai belisin.

Taja pia, iya madah taun tu mega udah ngepunka penusah laban penama orang ari menua luar udah balat ngirauka ati.

“Kita nemu nama bengkah pekara ke nyadi di Miri. Majak mayuh peranak Filipina mindah ke mengeri nya nengah chara belalai.

“Ari penyampau 100 iku suba, diatu penyampau nya udah nambah ngagai 400 tauka 500 lalu deka majak nambah.

“Kitai udah ngeluarka jaku tangkan ngagai ejensi ke bekaul sentang penusah tu tang sida enda bejalaika atur ke patut,” ku iya ba pengerami ke diatur ba Dewan Kunsil Nengeri ditu, kemari.

Ku Adenan, atur patut dipejalai dikena mutarka penusah tu sebedau majak ngelekai.

“Kitai enggai meda pekara ke udah nyadi baka di Sabah lalu deka nyadi di Sarawak. Aku minta ampun tang kitai enggai nyadi enda ngambi atur ke terit sentang isu tu.

“Aku nemu pekara tu engka mungkur raban nembiak enggau orang indu lalu anang ngumbai aku rindu ngereja pengawa tu.

“Tang kitai deka ngenah sida baka ke ngenah orang bukai, kitai meri sida makai, ngirup sereta palan endur ngenduh sebedau dianjung pulai ngagai menua diri,” ku Adenan.

Berindik ari penusah nya, Adenan ngansak ejensi ke bekaul ngangkatka tikas tusun pengawa nerit adat sida ngambika ulih mutarka penusah tu.