Dr Lambat: AEDIL diaku sebaka enggau gerempung pelajar bukai
KUCHING: Kenyau ditumbuh dalam taun 2008, Gerempung Pemansang Pelajar Jaku Iban ( AIDEL) udah nerima kelala ari opis pekara pelajar.
Presiden AIDEL Dr. Lambat Lindong madah, ba tetiap pengawa ke bekaul enggau pemansang pekara pelajar diatu, AIDEL bela bisi dikangau baka gerempung bukai.
“AIDEL udah diberi kelai kelala opis pelajar sebaka enggau Serakup Pengajar Sarawak (STU) sereta gerempung pelajar bukai.
‘Enti STU enggau gerempung pelajar bukai dikangau ngulu pengawa ke bekaul enggau pemasang pelajar, AIDEL deka mega dikangau nganjung pengari,” ku iya.
Dr lambat mansutka penerang tu ba jaku pengelalu rambau muka Aum Ninting Taun (AGM) ke 4 AIDEL ke diatur di seiti hotel ditu, kemari.
Aum nya dipenyadi Menteri Kanan ke mega Menteri Pemansang Rama Tan Sri William Mawan.
Iya nambah, pekara nya sigi seriris enggau tuju gerempung ti angkun nyukung penemu sentang polisi pelajar ke bekaul enggau pelajar jaku Iban sereta pemesai guna sistem pelajar Iban.
“AIDEL mega angkun ngaduka kerejasama enggau raban orang ti megai kuasa nyaga pemesai guna jaku Iban, reti nya pengawa gerempung bepelasarka leka jaku kolaborasyen iya nya nyukung, nulung, mantu sereta nyaup,”ku iya.
Berindik enggau nya, dikena kami ngemujur pengawa nyukung, nulung, mantu sereta nyaup gerempung tu mega minta sukung, minta tulung, minta bantu, minta saup, tandu iya.
Iya mega madahka AIDEL besaup ngemansang jaku Iban enggau Universiti Pendidikan Sultan Idris (UPSI), Opis Menteri Pekara Pelajar Malaysia, Dewan Bahasa dan Pustaka, Opis Pemadah sereta RTM.
Ba taun 2015 tu, Dr Lambat madah AIDEL deka ngatur pekit ngarang esei jaku Iban ungkup nembiak sekula sekondari baruh, atas enggau Form 6.
Kelimpah ari nya ku iya, sebengkah ‘roadshow’ enggau licha jaku Iban deka diatur di Lubok Antu kena bulan April tu.
Bela datai ngulu AGM ke 4 AIDEL, kaban ari Unit Kaunsil Penyanding Penemu Adat Asal Etnik, Profesor Madya Dr. Neilson Ilan Mersat, Profesor Dr. Bromley Philip, Jantan Umbat enggau bala bukai.