BPIEFF nyaup perintah ngelakuka palan belajar ngagai bala nembiak
KUCHING: Menija Besai Borneo Post & Utusan Borneo Phyllis Wong madahka Borneo Post International Education Fair ( BPIEF) sebengkah program dikena nyaup perintah ngelakuka palan belajar bekualiti ngagai bala nembiak di nengeri tu.
Iya madahka BPIEF diatur enggau penuh penyedar pasal nama pekara ti dipelabaka nyadi dalam dunya pelajar enggau belajar ti majak kompetitif , nyengkaum kualiti ti patut dikembuan nembiak.
“Nengah chara ti nyelai tu, BPIEF nyadika penyambung entara perintah ti deka nyendiaka rayat ngena pelajar ti bekualiti sereta penerang pasal program latih enggau pelajar ti patut dipilih ba institut pelajar tinggi ti deka ngangkatka pelajar dalam sosio-akademik di baruh seiti perabung.
“Semua pakar tauka orang ti bepengelandik pasal pelajar bisi ditu (BPIEF) magang ti nitihka tikas pelajar sereta ulih mantu nyapai juluk ati nembiak,” ku iya lebuh bejaku ba pengerami bejadika BPIEF Edisi Ke-6 (BPIEF 2015) kemari.
BPIEF 2015 nya ke diatur dua hari (kemari enggau seharitu) ba BCCK udah mujur dipenyadika Menteri Peng- intu Pengelantang, Orang Indu enggau Pemansang Ruang Bilik ti mega nyadi Patron BPIEF, Datuk Fatimah Abdullah.
Berebak enggau tu Phyllis ngenang madahka, Borneo Pos udah manggai 37 taun dalam dunya chelak sereta nyadung lebih ari 100,000 naskah surat kabar ti disadung di Sarawak, Sabah enggau Brunei.
Pelaba aku tebal agi apai indai besai macha surat kabar tu lalu mayuh orang baka aku temegah ati enggau penumbuh surat kabar tu,ku iya.
Kelimpah ari nya dalam jaku pengelalu, Chairman BPIEF Dorge Rajah madahka BPIEF iya nya sebengkah ari Tanggungjawab Sosial Korporat (CSR) surat kabar Borneo Post.
BPIEF taun tu bisi 88 buah institut pelajar tinggi ti nyendiaka mayuh macham bidang pelajar ti bebida di baruh seiti perabung.
“Tebal agi institut ke nyereta BPIEF tu endang institut ti tebilang di menua tu. Tuju sida nyereta BPIEF tu dikena nunjukka ngagai nembiak peluang sida jemah ila, nengah bidang pelajar,” ku Dorge.