BPIEF 2015 lubuk nembiak lepas SPM, STPM milih peluang belajar
KUCHING: Borneo Post International Education Fair (BPIEF) 2015 sempama baka lubuk ke nyendiaka mayuh penerang enggau palan belajar lebih agi ngagai bala nembiak ti baru tembu peresa SPM enggau STPM.
Audrey Libah ti baru udah nerima pemutus SPM madahka pengawa pemandang pelajar baka BPIEF nyendiaka mayuh macham institut sereta bidang pelajar ti senipak enggau peminta diatu enggau jemah ila.
“Taja pan tu keterubah iya aku datai ngagai BPIEF tang aku ngasaika BPIEF tu nyendiaka mayuh penerang sereta institut ke ngambi bagi ditu mega nyendiaka mayuh bidang ti senipak enggau pengerindu sereta pemutus peresa.
“Ditu mega, sida institut pelajar tu bisi nyendiak kaunseling,” ku iya lebuh dikerandau kemari madahka diri deka beratika peluang nyambung pelajar dalam bidang perubat.
Audrey ti asal ari Serian madahka iya nemu penerang pasal BPIEF iya nya ari surat kabar sereta bala bakih enggau bala kaban.
Nambahka nya Hasmah Sauni Samat, 39, nganjung anak iya Nur Afifah Haidir ti baru nerima pemutus peresa SPM ngiga kolej tauka universiti ti nyendiaka peluang belajar ti patut sereta senipak
“Ngena peluang ti bisi disediaka BPIEF tu, aku mai anak aku ngiga kolej tauka universiti ti patut endur nyambung belajar. Kami agi milih bidang enggau palan ke patut,” ku iya.
Kelimpah ari nya, CEO Executive College Sheila Sie lebih dikerandau ba pengerami ke sama kemari madahka BPIEF meri peluang ngagai Kolej nya ditemu orang mayuh lebih agi raban nembiak ti deka nyambung pelajar.
“Sukung enggau sambut ari orang mayuh ngagai Excutive College amat manah sereta kami amat temegah ati.
“Nengah pengawa pemandang baka tu, baka BPIEF taun nyin kemari (2014) kami nerima sereta ngerejsiter mayuh nembiak baru,” ku iya.
Lebuh ditanya bekaul enggau pemujur nerima perais Best Booth Design 2014, Sheila mega madahka diri temegah ati laban asil ari konsep enggau design bansal pemandang kolej nya nerima gelar ari BPIEF 2014.
“Beduduk ari pengeransing enggau pemendar semua pengereja pengawa ba kolej, konsep inovatif enggau teknologi ti dikena kami ngemanahka bansal pemandang taun 2014 nerima gelar ari BPIEF iya nya teulihka penuduk lumur satu ba pekit Best Booth Design 2014,” ku iya seraya madahka kolej nya udah enam taun nyereta BPIEF.