Kes enchuri motosikal pemadu mayuh nyadi di Serian
SERIAN: Enchuri motosikal iya nya kes pemadu mayuh nyadi di pelilih menua Serian, pia ku Ketua Polis Daerah Serian DSP Chung Aik Peng.
Iya madahka polis Serian benung chakah ngiga jalai mutarka kes enchuri motosikal kelimpah napi kes bukai ti bisi nyadi di Serian.
Taja pia ku iya kes enchuri motosikal ukai semina nyadi di serian tang nyengkaum di Kota Samarahan, Siburan, Padawan, Kuching sereta kandang menua kebukai.
“Penanggul besai ti ditapi piak polis di Serian diatu iya nya kes enchuri motosikal.
“Kami agi ngiga tauka nyidi bagi orang ti ngereja penyalah nya ( enchuri motosikal), ngambika kes tu ulih ditagang tauka diputarka.
“Kami ngelalau orang mayuh ti bisi motosikal patut ngiga chara engkeman dikena nyeliahka kes motosikal kena churi baka ngunchi motosikal ngena ‘double lock’ enggau chara ke bukai.
“Anang sesekali meri peluang ngagai penchuri,” ku iya ti nadai madahka statistik kes enchuri motosikal di pelilih menua nya.
Chung mansutka pekara nya lebuh dikerandau raban pengarang berita pengudah meri licha kimpin pengelikun enggau ngulu pengerami bejadika Kimpin Pengelikun ti diatur Majlis Daerah Serian (MDS) begulai enggau Polis Diraja Malaysia ba Dewan Masyarakat Serian ditu, kemari.
Program Kimpin Pengelikun ti ditaur nyerumba ngintu pengerami Jubli Perak 30 Tahun MDS mujur dipenyadika Kaban Kunsil Nengeri (ADUN) Kedup, Martin Ben.
Lebuh ditanya bekaul enggau isu jenayah meraka garis entara menua, iya madahka, naka ke diatu agi ulih dijaga piak polis.
“Taja pan pelilih menua Serian semak enggau Kalimantan Barat Indonesia iya nya semina 117 kilometer aja tang nyentukka seharitu agi ulih dijaga piak polis.
“Penanggul dadah ke bisi dikenang ba licha tadi kebendar ukai dikereja orang ti datai ari Indonesia tang orang menua kitai empu.
“Tang penanggul ke ditapi menua kitai enggau orang ari menua nya (Indonesia) iya nya sida datai kitu lalu diau di ladang lalu tebal agi sida nya nadai ngembuan pasport. Kami endang chakah matau pekara tu,” ku iya.
Kelimpah ari nya Chung lebuh dipinta ngenang Pangkalan Bit, iya madahka Pangkalan Bit nya ti keterubah lalu inisiatif nya dipejalaika Majlis Daerah Serian begulai enggau pasaraya H&L.
Iya madahka raban polis nyengkaum anggota polis trafik, peronda enggau anggota Bit bejalaika pengawa ba Pangkalan nya seraya nerima penerang ari orang mayuh ke bisi ngeriputka jenayah ti nyadi di kandang menua nya.
“Naka ke diatu statistik jenayah tauka penyalah ngelanggar undang-undang di Serian bisi nurun,” ku iya.