BPIEF 2015 nerima timbal ke manah ari mensia mayuh
KUCHING: Borneo Post International Education Fair Ke-6 (BPIEF 2015) udah mujur dipenyadi Menteri Pengintu Pengelantang, Orang Indu enggau Pemansang Ruang Bilik ti mega Patron BPIEF Datuk Fatimah Abdullah, kemari.
BPIEF 2015 diatur dua hari berunggu iya nya kemari enggau seharitu (22 Mac) ba BCCK, berengkah pukul 10 pagi nyentuk 6 lemai, lalu masuk nadai bebayar.
Taun tu, BPIEF dipasuk 88 buah institut pelajar tinggi menua tu, nasional enggau enggau entarabansa.
Juluk BPIEF ngelama tu endang naka ke ulih dikena ngempuru institut pelajar tinggi ba seiti endur ngambika nembiak enggau mensia mayuh bulih penerang sereta ngiga peluang belajar.
Entara institut pelajar tinggi ke bisi muka bansal ba BPIEF 2015 baka Executive College, Education New Zealand, Kolej Antarabangsa FAME, Swinburne University of Technology Kampus Sarawak, UCSI University, Curtine University Sarawak Malaysia, Kolej Sunway Kuching.
Market Management Service, MyCenTHE, Universiti Perubatan Newcastel Malaysia, Institut Teknologi Maklumat Nusantara, JM Education Counselling Centre, Kolej Yayasan UEM, ACCA, Universiti Terbuka Malaysia, Pusat Maklumat Islam, Universiti Terubka Wawasan enggau mayuh institut pelajar tinggi kebukai.
Ba pengawa pemandang pelajar tu, mensia mayuh ti datai ke lebih agi raban nembiak ulih betemu enggau kaunsilor kelimpah ari peresa psikometrik dikena nentuka ni bagi pengulih tauka penau nembiak nya.
Nambahka nya licha pelajar mega bisi diatur sereta dilicha raban profesyenal ti mantaika isu ke nyadi diatu nyengkaum pasal teknologi pemadah, pengawa dagang, injinir, perubat, minyak enggau gis, pengurusan pembinaan, perakaunan, seni kulinari enggau mayuh agi ke bukai.
Kelimpah ari nya, mensia mayuh mega bepeluang nerima perais ti dipelanja Kumpulan KTS, ACCA, Grand Margherita, Riverside Majestic Hotel, M Hotel, Tune Hotel Waterfront Kuching, Citadines Uplands Kuching enggau Pendidikan New Zealand nengah program enchabut tikit benasit.
Nyerumba pengerami bejadika BPIEF kemari, Fatimah diberi basa nyuaka perais ngagai Best Booth Design BPIEF 2014, lalu ke lumur satu iya nya Executive College sereta ditangkanka Education New Zealand enggau Limkokwing University of Creative Technology (lumur tiga).
Sama bisi datai ngulu pengerami bejadika BPIEF 2015 kemari, iya nya Direktor Opis Pelajar Nengeri Sarawak Serina Sauni sereta Direktor Opis Orang Indu enggau Ruang Bilik Sarawak Noriah Ahmad.
Nambahka nya, Operasyen Menija Borneo Post & Utusan Borneo Phyllis Wong, Ketuai Borneo Post Online ti mega Chairman BPIEF Dorge Rajah enggau See Hua Group Area Manager Wong Sing Seng.