Pedagang krafjari patut nemu chara ngemajuka industri kraf, ku Azran

BETONG: Raba pedagang krafjari patut nentuka industri kraf negrembai seriris enggau ubah pemansang menua.

Direktor Krafjari Malaysia Pampang Sarawak, Azran Arip madah, industri krafjari menua tu bisi jalai endur ngasilka penatai pemisi ke besai ngagai pedagang krafjari.

“Seni kraf pesaka bansa patut dihaha laban ngembuan reti ke chukup besai sereta ulih nyungkak penatai pemisi,” ku iya rambau bejadi Program Berandau Kraf 2015 enggau nutup ‘Bengkel Bimbingan Teknikal Kemasan Produk Kayu Kraf’ (parang) enggau Makmal Teknikal Batik Blok di Pusat Pembangunan Kraf Betong ditu, kemari.

Kenu ku iya, industri kraf ngerembai sereta nitihka peminta Krafjari Malaysia lalu ngadaka raban pedagang ke nyendiaka kraf bekualiti.

“Ngagai Krafjari Malaysia Sarawak, pemansang pedagang kraf patut disungkak agi nengah program-program lalau ngagai pedagang ke rinduka pengawa tu.

“Berebak enggau nya, kami nyendiaka peluang nengah program pemansang pedagang kraf di nengeri tu,” ku iya.

Taun tu, program ngelakuka pemansang kraf diatur ba genap bagi menua bepun ari Kuching, Sibu, Bintulu enggau Miri.

Taja pia, kami endang ngelaungka bagi menua bukai ke ngembuan mayuh barang kraf ke memanah.

Industri kraf ulih nyungkak penatai pemisi ruang bilik sekalika dikereja nadai putus tauka sentara aja.

Berebak enggau nya, mayuh raban pedagang rinduka produk anyam, ukir kayu, seramik enggau utai bukai.

“Orang indu muntang agi ngereja pengawa tu laban ke nadai berat dikereja,” ku iya.

Nya alai, Krafjari Malaysia sedia mantu sereta ngajar sida ke nyadi pedagang kraf di Sarawak.

Dikena ngasilka produk kraf bekualiti patut nemu peminta sesebengkah raban bansa laban nya mandangka pendiau sida.

“Nya alai, dikena nentuka industri tu ngerembai mansang, kitai patut bepun ngasilka produk bekualiti,” ku iya.

Nangkan nya, program workshop bisi dipasuk 23 iku penyereta kraf duku enggau 15 penyereta kraf Batik Blok ke diatur pengelama empat hari bepun 16 nyentuk 19 March tu.

Berebak enggau nya, bisi 40 pedagang dikangau ngulu sereta ngelakuka barang kraf ari serata nengeri.

Program tu dipenyadi Sapit Kepala Menteri Datuk Patinggi Tan Sri Alfred Jabu Numpang.

Sama bisi datai Menteri Muda Pengintu Pengelantang Pendiau Robert Lawson Chuat, ADUN Beting Maro Razaili Gapor, Sekretari Politik Menteri Kebun Dandang Besai enggau Komoditi, Dr Richard Rapu enggau bala pemesai opis perintah.