Pengawa berimba kampung nadai belisin deka dilengis
KUCHING: Perintah Nengeri deka majakka pengawa ngemunas penyalah berimba kampung nadai belisin di nengeri tu nyentuk ke lengis.
Kepala Menteri Datuk Patinggi Tan Sri Adenan Satem, nyemetak netapka pekara tu seraya madah orang ke berimba kampung nadai belisin nya perumpak nengeri tu.
Berindik enggau nya, pengawa ngemunas penyalah nya deka dipajak nyentukka ngagai nadai agi ditemu bisi dikereja di nengeri tu.
“Kitai ukai semina ngemunas penyalah nberimba kampung nadai belisin tang mega deka neritka undang-undang ba raban pemesai tauka sesiku ke ngembuan kaul.
“Ulih diperatika kitai, maya operasyen dipejalaika kitai tetemuka injin, lumpung kayu tang nadai seiku orang ditemu ba palan operasyen.
“Pekara tu nyadi laban bisi sekeda pemesai tauka orang madah pasal operasyen kitai ngagai sida ke berimba kampung nadai belisin nya,” ku Adenan.
Iya mansutka jaku nya rambau pengerami ngintu ‘Hari Kampung Entarabansa Renggat Nengeri Sarawak 2015’ di Dewan Undangan Negeri ditu, kemari.
Dikena nentuka pemujur pengawa ngemunas penyalah nya, perintah ku Adenan udah ngangau enam pemegai lisin besai (Big Six) nyereta komiti ngelaban pengawa berimba kampung nadai belisin.
“Aku ngarap kita (Big Six) nyanggup kangau tu lalu nyereta komiti. Tulung tesau kompeni ke dibaruh kuasa, menija sereta raban orang gawa dia enti sida deka meri suap, sida deka diketu gawa.
“Kami begunaka kerejasama ari kita semua. Kami enda ulih ngereja pengawa tu kediri laban penyalah berimba kampung nadai belisin tu udah lama nyadi, ke alai kitai patut ngetuka semua tu,”ku Adenan.
Ngenang sentang pengerami nya, Adenan madah, ”Pesan ari aku taun tu iya nya, intu kampung kitai ungkup raban nembiak baru,”.
“Iya ke amat, polisi kampung kitai enda tusah. Tebang kampung ke ditanam aja lalu awakka kampung asal tumbuh manah.
“Tang kitai bedau ulih bejalaika polisi tu laban pengeraja asal kitai bedau chukup, enti dipejalai industri tu deka labuh.
“Tang tu meh bengkah polisi ti dikedeka Sarawak. Enti kampung kitai abis ditebang 200,000 iku rayat kitai nadai agi batang pengawa,” ku Adenan.
Bela datai Menteri Pengatur Pengeraja asal enggau Rampa Menua II Datuk Amar Awang Tengah Ali Hassan, Direktor Opis Kampung Sarawak Sapuan Ahmad enggau orang bukai.