Mensia mayuh patut nemu kelai penyakit HFMD
SARIKEI: Trend kes penyakit kaki, jari enggau nyawa (HFMD) bisi diripotka nambah ba nengeri Sarawak lalu kes tu udah dipadahka ngelekai diatu.
Pakar Opis Pengerai, Dr. Teh Jo Hun madah, penyakit HFMD entara penyakit ke chukup jampat ngelekai.
“Raban ke muntang ditepan penyakit HFMD tu iya nya nembiak ke biak ari 10 taun.
“Penyakit tu muntang ngelekai enggau mayuh chara, chunto iya enti teteguka ai liur, insal, ai nanah, pemakai tauka bekau tubuh orang ke udah ditepan penyakit HFMD.
“Penyakit tu jampat ngerampit ba minggu keterubah orang ke ditepan penyakit. Maya nya mega, penyakit tu mudah ngelekai ketegal gaya hari ke angat sekumbang dua tu,” ku Dr. Teh.
Iya madah munyi nya ngagai pemberita rambau Program ‘Tagang’ HFMD diatur Opis Pengerai Sarikei bepalan ba Central Market Baharu, ditu, ekmari.
Kenu ku Dr. Teh, mensia mayuh patut nemu beberapa pekara, kelebih agi bekaul enggau chara penyakit tu ngerampit, kelimpah beratika kelai penyakit tu nyadi.
“Kelai penyakit tu nyadi iya nya tabin, gelata enggau ulser dalam mulut, nyelupu ba tapa jari enggau kaki, sereta enggai makai enggau ngirup.
“Ngagai nembiak ke ditepan penyakit tu, sida berasai pedis maya selupu nya pechah sereta kena pechik ai.
“Mensia mayuh patut nemu, jam ke diatu, agi nadai ubat dikena ngeraika penyakit tu. Ubat ke dikena ngubatka penyakit tu diatu semina dikena ngurangka pemedis ngagai sida ke ditepan penyakit,” ku Dr. Teh.
Nya alai, ku Dr. Teh, chara ke pemadu manah dikena nyeliahka penyakit tu meseti ngemeratka pemeresi diri sepanjai maya.
“Sebengkah ari chara ke pemadu ngasi dikena nyeliahka HFMD iya nya seruran nuchi jari sampai beresi. Pengawa nuchi jari sampai beresi patut diajar ngagai bala nembiak.
“Apai indai mega dilalau nyaga pemeresi diri enggau seruran nuchi jari enggau beresi sebedau negu anak, lebih agi pengudah pulai kereja.
“Berebak enggau nya, kami mega ngelalau bala apai indai seruruan ngemop lantai, nuchi agu, meresi bilik tinduk, enggau ayam anak mit awakka nadai lekat kuman,” ku Dr. Teh.
Enggau jaku kedut, ku Dr. Teh, penyakit HFMD ulih diseliah nengah chara nyaga pemeresi jari enggau tubuh diri empu.
Program ‘Tagang’ HFMD diatur Opis Pengerai Sarikei dikena ngiri penemu ngagai bala apai indai sentang penyakit HFMD.
Maya program tu mega, bisi diatur pengawa meresa peninggi darah, eksibisyen enggau servis kaunseling.
Urung 200 iku orang bisi ngelawa program tu.