Tagit 30 peratus orang indu mangku pengawa besai udah dijapai: Rohani
KUCHING: Perintah udah nyapai tagit nentuka 30 peratus orang indu mangku pengawa besai sereta megai tanggungpengawa ngaga pemutus ba opis perintah.
Menteri Pemansang Orang Indu, Ruang Bilik enggau Komuniti Dato Sr Rohani Abdul Karim madah tagit nya diatu udah manggai ba tikas 34 peratus.
“Program nentuka 30 peratus orang indu ba pengawa ngaga pemutus ba opis perintah udah dijapai.
“Juluk nentuka orang indu mangku pengawa nyadi direktor, ‘chief executive officer’ CEO) sereta pangkat besai bukai udah manggai ba tikas 34 peratus,’ku iya.
Iya mansutka penerang tu ba seiti aum pengarang berita pengudah ngulu pengawa bejadi sereta nutup Pengerami Ngintu Hari Orang Indu Antarabansa 2015 ke diatur di Plaza Merdeka ditu, kemari.
Rohani nambah, juluk nya dijapai asil ari program ke udah dipejalai perintah ngelamatu nengah embing Menteri Besai.
“Pengudah nyapai tagit ke ditetap tu kitai enda ngetu ditu aja tang deka bebendar agi ngadu program ngambika ulih nyapai tikas ke tinggi agi.
“Nadai sebarang randau udah diadu dalam atur netapka tagit baru tang kitai nagit tinggi agi ari ke udah, engka 50 peratus,’ku iya.
Meretika pemayuh tubuh orang indu ke benung belajar di palan pelajar tinggi, Rohani pechaya tagit 50 peratus ulih dijapai, tandu iya.
Iya ke mega Kaban Parlimen Batang Lupar madah Malaysia ba penuduk ke 2 dalam menua Asia nangkanka China sentang penyampau orang indu ti mangku pen- gawa besai bepelasarka pansik ke udah dipejalai.
Nengah pansik ti keterubah diadu sebengkah serakup ke nadai kaul enggau sesapa nya, Hong Kong ba penuduk lumur tiga ti ngerikut 31.5 peratus lalu Singapore ba penuduk lumur , 27 peratus.