Mong meransang apai indai besaup enggau pengajar nyuluk penyulut pelajar anak sida
SRI AMAN: Menteri Muda Betanam Betupi Moden, Datuk Mong Dagang ngelalau raban apai indai ngambi bela besaup enggau pengajar meransang anak ngulihka penyulut dalam pelajar.
“Kitai ke apai indai, anang semina ngarapka pengajar aja ngembing ngiring anak ba sekula, pemujur anak kitai ukai semina bepanggai ba pengajar tang ari saup semua.
Seraya ngelalau nembiak sekula ngulihka penyulut ba pelajar iya mega minta raban apai indai ngemeratka penyulut pelajar anak diri kena nyikap sida napi ubah pemansang ti majak mar.
Mong ke mega Kaban Kunsil Nengeri (ADUN) Bukit Begunan bejaku munyi nya ba sebengkah atur pengawa ‘Aku Janji’,Ujian Penilaian Sekolah Rendah ( UPSR), Sekolah Kebangsaan ( SK) Melugu ditu, kemari.
Berebak enggau nya iya minta apai indai nembiak sekula berunding enggau pengajar enti sema bisi penanggul ti tau ngemuntanka penyulut anak sida ba pelajar.
“Anang lembau berandau enggau pengajar enti anak kitai bisi penanggul ba pelajar, anggap pelajar ba anak kitai sebaka enggau chara beranakka puku ba pengawa dagang. Pemujur sida ba pelajar nya mih nyamin pengidup sida jemah ila.
Kelimpah ari nya Mong ngelalau apai indai ngemataka anak sida lebuh maya di rumah lebih agi maya sida belajar malam.
“Baka nya mega, perengka ti dikena anak kitai besekula enda tau enda dikemerat laban nya mih penyikap dikena sida ngansah penajam runding.
Ba jaku Kepala Pengajar, Louis Aom minta apai indai besaup enggau piak sekula nyapai juluk ba penyulut anak sida.
Iya minta apai indai ngan- juung anak sida bemalam ba buding sekula enti sida bisi penanggul nganjung ngambi anak lebih agi maya bisi kelas tambah.
“Di SK Melugu, apai indai enda ibuh irauka pemakai laban bekal pemakai ti dipanduk ke nembiak sekula jauh lebih manah enti dibanding enggau dulu menya.
Bela bisi ngulu atur pengawa nya kepala opis pelajar Pelilih Mit Sri Aman, Vivien Mujah sereta raban pengajar bukai.
Bisi 48 iku nembiak sekula dia nyain ‘Aku Janji’ UPSR 2015 maya atur pengawa nya.