Bansa Dayak enggai dikelaung
Nengah Langgur Pemansang Malaysia Lumpar Ke-11 raban tu minta diungkup ngambika enda ditinggal baka ke udah
KUCHING: Bansa Dayak udah jera nyadi pemerati sereta dikelaungka bansa bukai tang diatu deka sama ngambi bagi nyaup ngemansangka menua tu nengah langgur Malaysia ti deka datai.
Menteri Pemansang Tanah Tan Sri Datuk Amar Dr. James Masing madah, nitihka sejarah bansa Dayak nyadi dalam tiga iti renggat, iya nya maya 350 taun tu ke udah, komuniti Dayak di Kalimantan ngaga pemutus mindah ke Sarawak, kedua, iya nyadi maya taun 1963 lebuh Sarawak, Sabah enggau Singapore besetuju deka nirika menua Malaysia lalu ketiga nya digaga sehari tu (atur pengawa ti dipenyadi Masing kemari).
“Sehari tu, nampung pengawa taun 1963, profesional Dayak ke bepenemu mutuska deka mansang, nyingkang ke mua, tauka pemungkal iya, diberi peluang ngerandang jalai dikena mansang ke mua.
“Raban profesional Dayak ke bepenemu, bisi runding, buah penemu kita sereta chara kita mantaika penemu nya ukai semina nyadi kelai mandangka ulah kitai, tang iya deka mutuska penunga kitai Dayak Sarawak dalam berapa taun ti deka datai tu ila.
“Kebuah aku munyi tu, laban jurai penemu kita deka nyadi kelai alai, orang ke mending sereta ngaga pemutus di Malaysia deka mutuska penemu bekau ari jurai kitai sehari tu,” ku Masing.
Iya madah munyi nya lebuh bejaku bejadika ‘Dayak Input on 11th Malaysia Plan (2016-2020) Workshop’ ke diatur Gerempung Sarawak Dayak Graduates Association (SDGA) di sebengkah hotel ditu, kemari.
Pengawa tu digulu urung 150 iku orang sereta 10 iku kaban gerempung Dayak bukai.
Iy nandu baru, jurai sereta penemu nama kebuah bansa Dayak patut disengkaum dalam kaul langgur Malaysia, laban bansa Dayak pan sama bisi bagi dalam ngemansangka menua tu.
“Enti logik sereta pemanah kebuah enda disengkaum dalam jurai kitai, orang ke
“
Ari semua langgur pemansang ke udah dipejalai (RMK1- RMK10) bansa kitai udah jauh ditinggal tang ba RMK11 tu kitai minta diungkup ngambi sebaka
” enggau bansa bukai. Tan Sri Datuk Amar Dr. James Masing Menteri Pemansang Tanah
mendingka kitai enda betatika kitai, lalu semina ngumbai kitai semina ngulihka publisiti aja.
“Ngelama tu, ukai bansa Dayak enda nemu bagi sida iya dalam pemansang menua, ukai kitai enda dikeibuh, laban kitai empu enda nemu enti sadang tauka penemu kitai nya patut ke enda disengkaum sekali,” ku iya.
Kelimpah ari nya, ku iya, nyangka tuai-tuai pemesai Dayak kitai ngelama tu enda betatika pemerat meri timbal nya tauka enda.
“Ari semua langgur pemansang ke udah dipejalai (RMK1- RMK10) bansa kitai udah jauh ditinggal tang ba RMK11 tu kitai minta diungkup ngambi sebaka enggau bansa bukai,”
“Kitai mayuh bansa Dayak ke profesional ke tau meri timbal. Diatu kitai ngaga iya lalu ngarapka enda kelalu laun kitai enggau bansa bukai sama disengkaum dalam RMK-11 sereta RMK bukai,” ku iya.
Masing nandu baru, RMK- 11 deka bepun ari 2016 datai ngagai 2020, lalu dalam timpuh nya Malaysia deka nyapai menua ke mansang.
Maya nya mega, GDP Malaysia deka nyapai USD15,000, lalu maya kitai udah nyapai penyampau nya, Malaysia deka disengkaum nyadi menua ke mansang baka US, UK enggau sekeda menua Eropah bukai, lalu maya nya kitai deka nyadi menua kelas keterubah.
“Tang utai ke patut ditanya ngagai kitai empu, iya nya dini alai kitai diatu? Ulih ke enda kitai, maya 2020, ngembuan pemisi ke dilis nyadi menua ke mansang? Nake kediatu, kitai bansa Dayak agi jauh pejalai.
“Kitai agi bisi jalai ke jauh ke deka dilawa, mayuh bukit ke patut ditiki kitai. Kitai agi bisi penanggul sereta pemari ke ditapi kitai dalam kandang lima taun tu ila. Kitai enda tau enda ngeletakka perambu sereta ‘ input’ kitai dalam perambu enti Dayak bisi peluang sama tikas enggau bansa bukai di Malaysia,” ku iya seraya ngelalau bansa Dayak ngambika enda nyalahka orang bukai.
“Enti kitai enda ngaga nya diatu, komuniti Dayak kena tinggal bas baru nuju 2020,” ku iya.
Ba bansa Dayak ku iya, bisi sekeda pekara ke berat ke nyadi pemerat bansa Dayak di Sarawak, iya nya infrastuktur (jalai alun, karan enggau ai).
“Di sekeda sitak menua di Malaysia, sekeda perengka guna tu ukai penanggul tang di menua pesisir, penanggul ba kitai. Jalai nyadi pemerat dalam jaku pemansang. Nadai orang deka beranakka puku enti nadai jalai.
“Kedua, iya nya pelajar nyadi pukuk ke pengabis manah di semua menua di dunya tu. Malaysia udah melanja urung 21 peratus bajet nasional ke pelajar ke besai agi ungkup ari USA. Tu ke nyadi pemerat kitai,” ku iya.
Dalam licha nya kemari, sebarang resolusyen ti deka digaga, deka dianjung dulu ngagai EPU (Unit Perambu Ekonomi) sebedau iya dianjung Masing ngagai Menteri Besai, Datuk Seri Najib Tun Razak di Bintuku ujung bulan tu.
Sama bisi ngulu pengawa tu, Sapit Speaker Kaunsil Menua Datuk Doris Sophia Brodie, Kaban Kunsil Nengeri (ADUN) Batang Ai Malcolm Mussen Lamoh enggau presiden SDGA Dr. Dusit Jaul.