Undang-undang Hudud deka dibantah PRS nyema iya dibantaika di Parlimen

KUCHING: Pemutus perintah nengeri Kelantan ke nguna Undang-undang Hudud, nya peneka sida iya empu, ku Menteri Pemansang Tanah Tan Sri Datuk Amar Dr. James Jemut Masing.

“Enti sida ( Kelantan) deka nguna Undang-undang Hudud, nya barang ku sida iya, aku nadai kait enggau undang-undang menua nya, tang enti iya deka dibantaika di Parlimen, nya deka nyadi penanggul ngagai kitai…Parti (Parti Rayat Sarawak tauka PRS) enda besetuju, lalu deka mantah pekara Hudud di Parlimen,” ku Masing.

Iya madah munyi nya lebuh nyaut tanya pemberita bekait enggau pemutus sitak menua Kelantan ke deka nguna Undang-undang Hudud ti udah dikemendarka kena 19 March tu tadi, pengudah bejadika ‘Dayak Input on 11th Malaysia Plan (2016-2020) Workshop’ ti diatur ulih SDGA ditu, kemari.

“Atur nya enda nitihka Artikel 5 Konstitusyen, nyauka ‘Ultra-virus’ ari Konstitusyen 5 (of the Federal Constitution). Menua tu menua ke diuan pupu bansa sereta pengarap, kitai enggai nyadi mejal orang nerima utai ke di keenggai sida iya,” ku iya.

Masing ti mega nyadi Presiden PRS madahka enti sema Undang-undang Hudud nya dibantaika di parlimen, PRS deka mantah taja pan parti bukai deka nyukung.

“Aku nyebut tu nitihka penemu PRS, aku ukai ngarika ke SPDP, PBB, tauka SUPP tang aku bejaku munyi tu ngarika parti kami empu,” ku iya.

Iya mega nyamin keenamenam Kaban Parlimen PRS enda nyukung mosyen ti dibantai ulih Parti Islam SeMalaysia (PAS) di parlimen laban Rang Undang-undang nya udah dikemendarka Kunsil Nengeri Kelantan kena 19 March tu tadi.

“Nya kebuah aku madah, enti Kelantan udah ngemendarka Undang-undang Hudud nya di sitak menua sida iya empu, nya peneka sida iya, tang enti iya dibantaika di Parlimen, kami (PRS) deka mantah,” ku iya.

Undang Hudud, ‘ qisas’ enggau undang-undang ‘taksir’ ti dikumbai enggau nama ‘Syariah Criminal Code II 1993 ( amendment 2015)’ disetuju ulih Kunsil Nengeri Kelantan ulih 44 kaban Kunsil Nengeri sitak menua nya.

Kod undang-undang nya bisi ungkup ke penyalah sereta penalti ke tujuh macham penyalah baka enchuri, ngerumpak, nyamah anak, beleman tunsang, ngirup arak sereta pansut ari pengarap Islam.

Entara penalti baruh Undang-undang Hudud baka enchuri iya nya, jari kanan orang ke ngaga penyalah nya deka ditetak (penyalah keterubah), lalu enti sema penyalah nya digaga kedua kali, jari sepiak orang nya (ke agi tinggal) deka ditetak.

Ngagai penyalah ketiga kali, orang ke ngaga penyalah nya tau kena jil nyentuk 15 taun.

Ba tanya bekait enggau Pan TRUST Bakun (TAB), Masing madah, pan nya udah mantu urung 1,500 nembiak sekula ari sitak Bakun enggau serata menua tu dalam kandang 10 taun iya udah dibuka.

Pan RM15 juta nya dikena mantu nembiak nyambung pelajar sida iya kelebih agi dalam pelajar teknikal, lalu semua atur bukai agi sebaka lebuh nembiak sekula ke udah nembuka pelajar sida iya deka minta pan nya.