Peranak menua tu ditangkan anang ngelalaika kampar

MIRI: Rayat menua tu ditangkan anang sesekali nguji ngelalai tauka ngelindung kampar (PATI) maya perintah nengeri madahka diri deka nyidi raban sida tu.

Menteri Muda Penyambung, Datuk Lee Kim Shin madah, bisi sekeda peranak menua tu ke nguan rumah setingan nyuwa rumah sida ngagai PATI di Miri.

“Tu ukai penanggul baru, pekara tu nyadi kenyau taun nyin kemari iya nya bisi sekeda peranak menua ngelindung PATI enggau chara nyuwa rumah sida ngagai kampar,” ku iya madah ngagai Utusan Borneo kemari.

Lee mega madah, perintah nengeri deka bebendar nyidi awakka raban kampar tu ulih diburu pulai ke menua asal sida.

“Aku udah minta peranak menua tu ke nguan rumah setingan ke udah angkat mindah ke bukai anang nyuwa rumah sida ngagai PATI laban sida ulih diukum,” ku iya.

Kenu ku iya, rumah ke diuan PATI deka direrak tekala nya lalu tu enda nyengkaum rumah ke diuan peranak menua tu.

“Aku deka madah operasyen ke digaga sebedau tu semina mungkur rumah suwa PATI lalu nadai bekait enggau rumah ke diuan rayat menua tu,” ku iya.

Jaku tuduh raban penyakal ke ngumbai raban penerit adat kelalu nadai pengasih maya bejalaika operasyen mandangka sida deka ngelindung raban orang tu (PATI).

“Kami mela sida enggau manah sereya nganjung sida ngagai palan imigresen, diberi makai ngirup, baka ni sida ngumbai kami nadai pengasih,” ku iya.

Nangkan nya, ku Lee, Kepala Menteri Datuk Patinggi Tan Sri Adenan Satem mega nyemetak semua kampar patut dianjung pulai magang ke menua asal sida.

“Kami enggai meda pekara ke nyadi di Sabah, nyadi di Sarawak kelebih agi Miri. Nya alai raban sida tu terus disidi ngambika ulih dianjung pulai,” ku iya.

Entara kandang endur dipelaba bisi alai PATI belalai iya nya Kuala Baram, Pujut, Piasau Utara enggau Batu Niah.