Wan Junaidi: Sarawak enggaika penyadi baka di Lahad Datu ditandu
MIRI: Seratus empat puluh enam bansa Suluk enggau lima Indonesia ditangkap raban penerit adat di Miri kandang seminggu ke udah.
Bisi empat belas buah rumah nyadi palan pengenduh sida ke tama nadai beradat tu di Pujut 7 enggau Kampung Batu Satu, Lutong mega udah dirubuh maya operasyen nya, apin lama ke udah.
Menteri Pekara Dalam Menua Datuk Wan Junaidi Tuanku Jaafar sereta Kepala Opis Imigresen Nengeri, Datu Robert Lian ke bela bisi ba atur pengawa nya madah, opis menteri enggau naka ulih munaska pengawa masuk enggau nadai beradat baka ke nyadi di Miri.
Sida ke ditangkap maya operasyen tu nadai ngembuan dokumen pejalai ke menuku.
“Perintah nengeri Sarawak begulai enggau Opis Menteri Pekara Dalam Menua udah ngayanka atur ke terit ba sebarang orang luar ke tama enggau enda beradat kitu,” ku Wan maya dirandau pengarang berita di Penyangkai Bilun Antarabansa Miri (MIA), ditu.
Ku Wan, semua ke ditangkap tu ditanka dulu sereta deka dianjung pulai ngagai menua sida pengudah timpuh ukum dipejalaika ditu.
Tandu Wan, Opis Menteri iya enggai meda penyadi baka di Lahad Datu ditandu ketegal enda tetagangka peranak menua luar masuk kitu enggau enda beradat.
“Lalu ari nya, semua ejensi penerit adat patut besaup nagang seraya ngemunaska ulah orang ti tama enda beradat. Anang saru ngumbai Sarawak muntang dipasuk raban orang ti baka tu,” ku Wan.
Kelimpah ari nya, iya muji semua ejensi ke udah bejalaika pengawa berengkah ari pukul 1.00 nyentuk pukul 4.00 dinihari.
Bela besaup bejalaika atur nya, opis Imigresen, GOF, Ejensi Maritim, JPA3, Kaunsil Bandaraya Miri, opis Tanah enggau Survei, RELA sereta SEB.
Ku iya, tebal ke ditangkap nya nembiak enggau orang indu, sida ke lelaki sempat lari ninggalka palan pengenduh sida.
Bisi seiku indai orang ke benung sarat ngandung, dibai ke sepital Miri lalu beranak din, ku iya.
“Kitai manah enggau sida taja pan nemu ulah enda beradat tu dikenggaika semua peranak menua tu,” tandu iya.
Sida ke ditangkap tu beumur entara sebulan ngagai 50 taun lalu tebal sida benung tinduk lebuh diabas kenyit raban ejensi penerit adat malam nya.
Semua sida ditan ba Kompleks Detensyen Imigresen Bekenu
Berebak enggau nya, Datuk Lee Kim Shin madah, Kepala Menteri bisi nanya iya ninting hari pasal gaya ulah orang luar ke masuk ke Miri enggau nadai pemendar.
Ku iya, Datuk Patinggi Tan Sri Adenan Satem minta semua penyadi ari ulah orang ke masuk enggau enda beradat di Miri diterang ngagai mensia mayuh sereta tusuika atur ti patut dipejalaika perintah Sarawak.
Bela bisi nyempulang atur pengawa nya, sapit direktor opis Imigresen Sarawak, Hamfatullah Syawal Hamdan.