Kemeranka daya idup bepengerai dikena nyeliahka penyakit tungkul ati
SIBU: Mensia mayuh patut ngemeratka pengawa nyaga pengerai diri kelebih agi bekaul enggau penyakit tungkul ati.
Kaban Kaunsil Amanah Yayasan Jantung Sarawak Datin Patinggi Dato Jamilah Anu madah, mensia mayuh patut ngemeratka sentang penyakit tungkul ati ke ditemu mayuh munuh nyawa mensia di Malaysia.
“Penyakit tungkul ati bepun ari daya idup kitai, baka chara milih pemakai, nya alai kitai patut bagas besenam sereta anang kelalu tusut runding,” ku iya.
Jamilah madah munyi nya rambau ‘ Minggu Jantung Sibu 2015’ ke diatur Yayasan Jantung Sarawak begulai enggau Yayasan Jantung Malaysia di Star Mega Mall, empai lama ke udah.
Jamilah madah, tuju program ke diatur sehari nya dikena meri penemu ngagai mensia mayuh pasal nyaga pengerai tungkul ati.
“Yayasan Jantung Sarawak udah mantu nyendiaka injin ungkup pesakit tungkul ati di ‘ Pusat Jantung Sepital Besai Sarawak (HUS), mantu pesakit bebuntas di Singapura enggau Kuala Lumpur,” ku iya.
Nangkan nya, Yayasan Jantung Sarawak mega bisi ngatur mayuh program baka licha, eksibisyen, randau, beperesa pengerai enggau bemacham kiin dikena ngiri penemu ngagai mensia mayuh pasal penyakit tu.
‘ Minggu Jantung Sibu 2015’ berambaika leka jaku ‘ Heart- Healthy Environments’, diatur 20 nyentuk 22 March dikena meri peluang ngagai mensia mayuh meresa pengerai diri pechuma.
Kelimpah ari nya, bisi diatur licha pengerai, mandangka lauk sumai manah ke pengerai, zumba, betanda enggau mayuh agi kebukai.
Sama bisi datai Menteri Wang Kedua Dato Sri Wong Soon Koh, Direktor Yayasan Jantung Malaysia Ainon Kuntom, Chairman Program Yayasan Jantung Sarawak ke mega Kaban Kunsil Nengeri (ADUN) Nangka Dr Annuar Rapaee enggau Chairman Opis Kaunsil Mengeri Sibu (MPS) Datuk Tiong Thai King.