Anang malu ngelawa ejensi, opis perintah betanyaka penerang pasal pemansang

SARIKEI: Rayat di menua pesisir patut regas enggau orang berebutka sebarang peluang ke bisi ayan nyema sida deka ngasaika penyenang dudi hari.

Ketuai Nembiak Parti Sa’ati Rayat Sarawak (SUPP) Pampang Sarikei, Teng Ung Woo madah, juluk nya ulih djiapai nyema mensia mayuh ngenyempilka diri enggau ejensi sereta opis perintah ngambika sida ulih lengkas nerima mayuh bantu ke diberi perintah.

“Ratut patut nemu ejensi enggau opis perintah ejen ke betanggungjawap ngaduka pemansang ngagai rayat.

“Kitai deka meda mensia mayuh anang malu ngelawa opis perintah, laban ejensi tu endang palan ke diguna ngemansangka rayat.

“Nengah ejensi tu, rayat ulih ngulihka penerang pasal perintah. Berebak enggau nya mega kitai enggau meda sida (rayat) mudah pechayaka penerang bula ke ditabur raban orang ke nadai betanggungjawap laban nya tau meri pangka ke enda manah ngagai menua,” ku Teng.

Iya madah munyi nya rambau Kimpin Membara Malaysia, ke diatur di Rumah Anthony, Bayong, empai lama ke udah.

Program tu diatur Nembiak SUPP Sarikei begulai enggau Opis Pekara Raban Bansa (JASA) Sarikei, Opis Pemadah Malaysia Sarikei, Opis Pengerara Api enggau Penyah Penusah Sarikei.

Aktiviti tu bisi dipasuk enam buah rumah panjai ke semak ditu.

Berebak enggau nya, Teng nesau mensia mayuh ngam- bika anang lembau ngemajuka diri ba pengawa dagang.

“Bidang pengawa dagang diatu, enti dikereja bebendar ulih meri pengelantang ngagai diri sebilik.

“KItai sama nemu diatu, mayuh rayat ngembuan penau enggau pengelandik ba bidang tu, tang sida agi enda nemu chara deka ngemansangka penau diri, ku Teng.

Nya alai, ku iya program baka tu manah amat dikena ngedut kaul ejensi perintah enggau rayat.

Mayuh bengkah aktiviti bisi diatur nyerumba program tu baka licha ari raban bomba, licha ari opis JASA sereta mayuh agi aktiviti ke bukai.

Maya program tu, bisi diatur pengawa nyuaka perengka pengerara api ngagai bala pengari rumah panjai.