Masing, Rundi nyemetak madah enda nyukung undang-undang Hudud ditu
KUCHING: Parti Pesaka Bumiputera Bersatu (PBB) sereta perintah Barisan Nasional (BN) enda nyukung undangundang Hudud dikena di nengeri tu, ku Datuk Stephen Rundi.
Iya ke mega nyadi Sekretari Besai BN Nengeri madah Kepala Menteri Datuk Patinggi Tan Sri Adenan Satem udah suah netapka pemutus PBB enggau Perintah Nengeri sentang pekara nya.
Berindik ari nya, Rundi ngasaika BN enggau parti bukai dalam serakup enda patut sengapa ngelemika penegap BN ketegal ti deka meda PAS nyapai juluk sida nengah atur neritka undang-undang Hudud.
“Pengeran PAS neritka undang-undang Hudud endang terang ketegal deka ngenegapka parti sida.
“Berindik ari nya, nadai kebuah BN sereta parti bukai dalam serakup patut bejudika penyerakup ke udah lama digenggam rat ngelamatu ketegal ti deka meda parti bukai (PAS) nyapai juluk sida,” ku Rundi lebuh dipinta ngenang penemu Parti Rakyat Sarawak (PRS) sentang Undang-undang Hudud.
Rundi ngasaika PRS bisi hak mansutka penemu sida bepelasarka chara sida beratika pekara ke nyadi, sentang undang-undang Hudud.
Taja pia, iya pechaya PRS ke nyadi sebengkah parti dalam serakup BN deka berunding baru sentang pekara tu pengudah isu diputar.
Kemari, presiden PRS Tan Sri Dr James Masing enggau nyemetak madah, parti iya deka pansut ari BN enti perintah BN nyukung undang-undang bekaul enggau Hudud ti deka dibantaika PAS ba parlimen.
“Parti PRS endang enda setuju,” ku Masing ke mega Menteri Pemansang Tanah maya ngenang pengeran Presiden PAS Datuk Seri Abdul Hadi Awang ti deka mantaika mosyen undang-undang Hudud ba aum parlimen ke diatu.
Hari Empat ti tadi, 44 iku Kaban Kunsil Nengeri (ADUN) di Kelantan, nyengkaum BN setuju nyukung ubah undang-undang sentang Kanun Jenayah Syariah II.
Masing netapka enam kaban parlimen ari PRS tetap enda nyukung enti mosyen nya dibai ba renggat Dewan Rakyat.
Iya ke mega Menteri Kanan dalam kabinet Sarawak madah, undang-undang Hudud enda engkeman enggau konstitusyen menua sereta pupu bansa.
“Nuan enda patut ngansak orang bukai pechaya ke pekara ti dipechayaka nuan,” ku iya.