Tanggungpengawa media seruran besai guna ngagai mensia mayuh
KUCHING: Raban media ngembuan tanggungpengawa ke berat dalam komuniti, laban nyadi penabur berita ngagai mensia mayuh.
Menteri Muda Pengawa Berumah, Datuk Abdul Karim Rahman Hamzah madah, raban media di Kuching entara komuniti ke ngembuan kaul ke terit enggau mayuh renggat komuniti, ari orang ke ngatika diri datai ngagai kompeni ke besai-besai.
“Media di menua tu entara media ke ngembuan kaul ke terit enggau mayuh macham renggat pupu bansa, kompeni tauka ijensi Perintah.
“Pengawa media nyadi nyadi mata, pending komuniti ke ditusui nengah berita. Am- bika banding ditu, sida tu meh dikira entara raban media ke ngembuan kaul ke terit enggau mensia mayuh enda ngira baik nya korporat, ijensi perintah, parti politik (enda ngira nya parti politik ke megai menua tauka penyakal) sereta mayuh macham kaul bukai ke dikembuan sida iya (media),” ku Abdul Karim.
Iya madah munyi nya lebuh ngelaluka bala komiti Gerempung Pemberita Pelilih Menua Kuching (KDJA) ti betuaika chairman gerempung nya, Sulok Tawie nemuai meri bansa ngagai iya di Begunan Opis Pengawa Berumah ditu, kemari.
Sama bisi datai kaban KDJA ke bukai iya nya Sekretari Jacqueline David, Kaban Eksco Alice Wee, Mandal Chairman I Jeeridyne Chan enggau pengari MLNG, Johannes Ridu.
Abdul Karim ti mega nyadi Menteri Muda Pemansang Nembiak (Nengeri) muji kaul media di menua tu ngembuan kaul ke terit kelebih agi enggau opis perintah menua tu, baka Bomba, JPAM enggau Polis, ke seruran bekerejasama enggau media.
Penemuai raban MLNGKDJA betemu enggau Abdul Karim laban ngelaluka penatai Menteri Muda nya bejadika atur pengawa lumba enggau main gerempung nya enggau MLNG ti deka digaga kena 13 Jun tu ila.
Lumba enggau Main ti digaga ulih MLNG-KDJA nya seiti atur pengawa ninting taun ke digaga ke bala pemberita di nengeri tu.
Tang ke sekali tu, 13 Jun tu ila, Lumba enggau Main MLNG- KDJA deka mai sereta nyadi penyereta pekit Futsal enggau Badminton nyengkaum raban Bomba, JPAM enggau Polis (Pampang Khas IPD Kuching) ti deka digaga di Le Park, Kuching.
Pekit Lumba enggau Main tu mega deka meri perais ke besai, ti dipelanja mayuh kompeni nyengkaum ari MLNG empu.
Penerang silik agi bekait enggau Lumba enggau Main MLNG-KDJA tau ditanya nuju Sekretari KDJA Jacqueline David ( whatsapp 016-8546251) tauka nengah Pengatur Chairman atur pengawa tu, Anasathia Jenis (019-8398776).