250 iku pemesai PPM dipinta bejalaika operasyen matau rambau Hari Raya

KUCHING: Unit Polis Marin (PPM) deka nguna semua aset ke dikemisi ba operasyen rambau musin pengerami tu,ku Komander PPM SAC Dato Abdul Aziz Yusoff.

Ba penemuai iya ke Kuching seraya ngemujur pengawa ngelekat ‘ lencana’ tukang nyelam polis di PPM Wilayah 5 (Bintawa) kemari, Abdul Aziz madahka semua 250 iku pemesai ejensi nya deka bejalaika operasyen matau rambau pengerami Hari Raya ti deka datai.

“Kitai deka bejalaika tanggungpengawa baka ke selama lalu aku seruran nesau sida besedia napi penusah ke enda disadang.

“Semua aset deka dikena enggau manah ngambi tau nentu pengelanchar opera- syen kitai,’ku iya ba seiti aum pengarang berita pengudah tembu pengawa ngelekat ‘lencana’ ngagai 16 iku penyelam PPM.

Iya nambah PPM Sarawak diatu bisi 20 buah kapal enggau bot nginau.

Ngenang sentang unit penyelam PPM Sarawak, Abdul Aziz madah sida dibagi ngagai dua pampang iya nya seiti di Kuching lalu seiti agi di Bintulu.

Ku iya unit tu dibagi dua ngambika sida ulih datai ba palan penusah enggau lengkas.

“Kelimpah ari nya, unit tu mega suah nyaup Unit Nasat Pengawa Jai baka ngiga barang bukti ti dibuai ke dalam sungai (ai),’ku iya.

Nyaut tanya pemberita, iya madah sida bisi berunding deka nambah penyampau tubuh raban pemesai PPM di Sarawak.

Taja pia, iya madahka pekara nya bedau diputus lalu diatu semua aset ke dikemisi deka dikena enggau manah.