Pekit Betabuh BDCF 2015 benung dibuka ngagai raban bansa Dayak
SIBU: Mensia mayuh kelebih agi bansa Dayak ke bisi pengelandik ‘Betabuh’ (nebah perengka muzik tradisional Iban) enggau Ngajat diperansang masuk pekit nya beserimbai enggau Pengerami Main Asal Dayak Borneo (BDCF) 2015 kena 31 Julai tu.
Kenu ku pengari pengatur pengerami tu, Ambrose John Lalong, pekit tu tebuka ngagai bansa Dayak ke bisi ati sereta bepengelandik lalu meseti beumur 18 taun ke atas.
“Pekit Ngajat dibagi ngagai lelaki enggau indu lalu pekit Betabuh tau beraban entara empat tauka enda lebih tujuh iku,” ku iya madah ngagai Utusan Borneo, ensana.
Iya madah, pekit tu deka diatur bepalan ba Panggau BDCF di Dataran Bandar Sibu Fasa I.
“Perais ke disedia ungkap pekit Betaboh iya nya champian RM500, lumur dua RM400 enggau lumur tiga RM300 lalu disempulang terupi enggau midul.
“Udah nya perais pengaga ati RM100 deka diberi ungkup pemekit ke bulih lumur empat nyentuk ke- 10,” ku iya.
Ambrose madah, perais ke disedia ungkup pekit Ngajat Lelaki enggau Ngajat Indu iya nya RM300, RM200 enggau RM100 sereta disempulang terupi ungkup pemekit ke nyadi champian, lumur dua enggau tiga.
Perais pengaga ati, ku Ambrose deka diberi duit RM30 iya nya pemekit ke bulih lumur empat nyentuk ke-10.
“Ketetiga pekit tu ulih dipasuk enggau nadai bebayar,” ku iya.
Form masuk pekit ulih diambi ari Ambrose nengah lumur 016-8931385, Steven Rom ( 013- 8183855), Karen Thomas (010-5260187) tauka Senorita Salleh (013-8025652).
Form ke udah tembu diisi meseti dianjung baru ngagai komiti pengatur enda tau ngelui pukul 5 lemai kena 28 Julai tu.