Jematan baru di Nanga Mejong dipelabaka tembu Oktober 2015

SKRANG: Projek ngaga jematan baru di Nanga Mejong, Ulu Skrang udah dilancharka kaban Parlimen (MP) Lubok Antu enggau Kaban Kunsil Nengeri ( ADUN) Engkilili kemari.

Pengawa nerasi tanah projek nya diadu ngerimbai rumah panjai Nanga Mejong.

Penembu jematan nya ila deka ngemuntangka pejalai peranak Nanga Mejong ngagai Jalai Ulu Skrang ari ke ngelamatu sida semina ulih begunaka perau, enti deka ngelayang ke sepiak.

Taja pan ukai penanggul besai meraka sungai nya nguna perau tang ayas jagu ke suah dipeda ayan di sungai nya ngeruga pengelikun sida.

“Ai sungai tu chukup chiru ke alai kitai suah meda jagu ayan ditu, lalu ketegal nya kitai begunaka jematan ditu,”ku Tuai Rumah Angang Isang (Nanga Mejong).

Seiku agi peranak menua nya, Gait Kudang madah jematan nya ila deka ngemudah sida mindah kelebih agi maya nganjung anak nurun sekula sereta pia mega maya bebelika barang di pasar Betong.

Jematan gantung ke lama ke suah dikena sida ngelama tu di Nanga Mejong udah putus dituju ai bah ke nyadi ba bulan Februari tu tadi.

Bejaku ba pengerami nya, Rayong bisi nerang ngagai peranak Nanga Mejong kebuah pengawa ngaga baru jematan laun dikereja.

“Aku minta ampun ngagai peranak menua tu laban laun bejalaika pengawa ngaga jematan ke baru.

“Mayuh atur pengawa patut dititih sebedau ke ulih ngepunka pengawa, ngarapka kita semua mereti,”ku iya.

Berindik ari nya, Rayong ngarapka peranak Skrang meri terima kasih ngagai perintah Barisan Nasional laban ke udah ngaduka mayuh pemansang ba endur nya.

Rayong mega bisi ngagihka RM15,000 ngagai rumah panjai Nanga Mejong dikena sida ngatur pengawa.

Ngenang kaul ke sama, Nyalau ngenataika pengaga ati pengudah pengawa ngaga jematan mujur dilanchar lalu disadang tembu ba bulan Oktober taun tu.

Iya mega ngagihka RM5,000 ngagai rumah panjai Nanga Mejong.

Bela datai Pemesai Pelilih Lubok Antu Jack Aman Luat enggau Injinir Opis Kereja Raya (JKR) Sri Aman Cassidy Morris.