Tuai Rumah di Selangau dipinta ngambi surat di PDS

SIBU: Bala Tuai Rumah di pelilih Selangau dipinta lengkas ngambi kunchi peti surat komuniti ari Opis Pelilih Selangau (PDS).

Kebuah pia laban mayuh surat dalam peti surat nya bedau diambi ngujungka nadai agi alai endur nepu surat ke baru datai.

Kenu ku ejen peti surat komuniti di Selangau Ngumbang Awit, mayuh sebana digaga sebedau tu madahka surat ke bisi datai enda datai ba jari penerima peranak rumah panjai.

“Semua adres ke nuju penerima peranak rumah panjai di pelilih Selangau endang nguna peti surat komuniti tu magang. Kami nangi nyangka bisi surat ke berat tang laun diambi deka meri penanggul ngagai penerima, “ku iya madah ngagai Utusan Borneo, kilah ensana.

Kenu ku Ngumbang, di pelilih Selangau dipelabaka ngembuan urung 350 buah rumah panjai lalu semua nya endang nguna servis peti surat komuniti tu magang.

“Laban nadai pos opis di pelilih ditu, nya ngujungka kami nguna servis peti surat komuniti. Bisi tusah mimit laban kami ditu nadai pos opis.

“Selangau ke udah diangkat nyadi pelilih menua patut bisi pos opis laban rayat ke nguan menua tu majak nambah,” ku iya.

Iya madahka surat ke bisi diterima endang ke bisi dirijista enggau mayuh agi ke bukai.

“Aku ngarapka bala Tuai Rumah ulih ngelimpangka diri ngambi surat nembiak redai sida ari peti surat komuniti ambis nadai dua kali seminggu.

“Nyema enda diambi surat nya deka ditikalka pulai ngagai orang ke ngirum,” ku tandu iya.

Berindik ari nya, Ngumbang ngarapka bala Tuai Rumah di pelilih Selangau ke bedau ngambi kunchi peti surat nya dipinta betemu dulu enggau iya empu enggau naka lengkas.

Iya madah, bala Tuai rumah ke digerah tu kelebih agi sida ke dijaga Pengulu Balui, Pengulu Jawa, Pengulu Jerampang, Pengulu Michael enggau Pengulu Siew.

“Sida ( Tuai Rumah) ulih betelefon nuju lumur aku empu 019-8587325 enggau naka pengelengkas,” ku iya.