Blikau muji mayuh bengkah program udah diatur KDC ungkup rayat Kapit
KAPIT: KabanKunsilNengeri (ADUN) N55 Katibas, Datuk Ambrose Blikau Enturan muji Opis Kaunsil Pelilih Kapit (KDC) beduduk ari bemacham servis komuniti enggau program pemansang ke udah diatur sida di menua nya.
Kenu ku Blikau tu nyengkaum bekaul pekara meri pelajar sereta nerenakka penyedar ngagai rayat pasal pemesai guna nyaga pemeresi rampa menua sereta mega ngiring mensia mayuh nitihka chara idup bepengerai.
“Program tu ngemai besai reti laban iya ulih ngaul komuniti rumah panjai nengah main interaktif dikena ngadaka pangka ke besai agi ngagai sida kelebih agi nengah daya idup ke bepengerai.
“Tu ukai semina ngemai reti semina eksesais aja tang mega nyengkaum chara milih pemakai tauka ai irup mega patut dijaga,”ku iya.
Blikau mansutka jaku nya rambau Nutup Pro- gram Servis Komuniti ke-7 nyerumba Pengerami Pemesai Begulai enggau Rayat diatur KDC berambai jaku ‘Program Budaya Hidup Sihat’ ba 21 pintu rumah panjai Rumah Sering Anak Salang ba Nanga Temiang, Song, apin lama ke udah.
Blikau madah, pemeresi kandang menua ngelingi mega ulih mantu ngadaka pengerai ngagai mensia mayuh.
Nya alai, rayat patut mendingka jaku lalau perintah pasal nyaga pemeresi kandang rumah diri.
“Komiti Pemansang enggau Pengelikun Genturung Pendiau ( JKKK) meseti chakah agi ngelalau rayat ngambika enda nakung ai lalu suah bejalaika pengawa beripai meresi kandang rumah panjai sida dikena nyeliahka nyamuk betelu lalu ngemai igi penyakit denggi, “ku Blikau.
Iya madah pengerai nya sempama baka pengeraja. Enti sema bepengerai, kitai majak produktif, tang enti sakit tentu deka mangka ruang bilik ketegal ke enda dapat ngereja pengawa ngiga belanja.
“Perintah melanja bejuta ringgit dikena bejalaika pengawa merubat pesakit. Enti sema kitai ngemeranka gaya pengidup ke bepengerai nyadi belanja nya ulih dikelimat dikena perintah ngatur pemansang bukai.
Iya mega ngelalau raban komuniti rumah panjai ngambika enda bebuaika uras ngagai sungai tauka ba sebarang alai. Kebuah laban manah agi bejaga ari ke berubat. Kemeranka pengawa nyaga pemeresi ngelingi rumah panjai,” ku iya.
Blikau madah, program servis komuniti tu engkeman amat dipejalaika sereta ketebal agi raban komuniti menua pesisir mega begunaka pelajar pemesai guna nyaga pemeresi rampa menua enggau sungai sereta nyaga pemeresi kandang menua sida ari igi penyakit.
Berebak enggau pengerami nya, Blikau bisi ngemendarka geran penyampau RM10,000 ngagai Biro Indu JKKK Rumah Sering, sentara RM5,000 diberi ngagai genap Biro Indu JKKK Rumah Chang enggau Rumah Jimbun ba Nanga Temiang.
Iya mega bisi ngemendarka geran penyampau RM10,000 ngagai Kelab Rekreasyen enggau Lumba Kaunsil Pelilih Kapit (KADICO) dikena sida bejalaika aktiviti sepanjai taun.
Dulu agi ari nya Blikau dibai nanam pun buluh kelai nutup pengerami nya lalu bejadi projek agu JKKK Rumah Sering ke dipelanja kaunsil.
Bela bisi datai bini Blikau, Datin Marie Therese Mathias, Ketuai Kunsil Opis Pelilih Menua, Philimon Nuing, Sapit Ketuai Kaunsil Opis Pelilih Menua, Tapah Ata enggau bala ke bukai.