Dr Richard mujur nengkebang sistem pengerara api ungkup rumah panjai
KUCHING: Sistem Pengerara Api di rumah panjai endang digaga ungkup rumah panjai dikena napi tauka ngerara api ngambika enda nyerarai ngagai bilik bukai, ti suah nyadi ba rumah panjai di menua tu.
Di Sarawak, penyampau rumah rumah panjai di menua tu bisi urung 3,376 buah nyengkaum genturung pendiau ke tebal agi di Betong, Layar, Lubok Antu, Julau, Meradong, Selangau, Marudi, Sibu, Kapit, Song enggau Belaga.
Nitihka statistik rumah panjai angus ke nyadi di serata menua Sarawak dalam taun 2011 enggau penyampau pengerugi reta tengkira ketegal penusah angus iya nya RM28 juta (25 kes) dalam taun 2011, 2012 (18 kes), RM23 juta (19 kes) dalam taun 2013 lalu RM27 juta (21 kes) dalam taun 2014.
Berindik ari nya, seiku pengelicha ari Swinburne University of Technology, Kampus Sarawak, Dr. Richard Belanda anak Dagang ti beasal ari Lubok Antu, udah ngaga sebengkah sistem dikena ngerara api ungkup dikena ba rumah panjai.
Sistem tu ku iya, udah dikemendarka Opis Pengerara Api enggau Penyah Penusah (BOMBA) ti udah dipenyadika Chairman 1MSAC Datuk Joseph Salang Gadum ba Kg Mujat, Serian kena 8 November taun 2014, lalu nangkanka nya sekali agi dipenyadika Menteri Besai Datuk Seri Najib Tun Razak di Sg Gelam, Sebauh Bintulu kena 30 Mac taun 2015 tu tadi.
“Sistem tu udah dikemendarka Direktor Opis Pengerara Api enggau Penyah Penusah (BOMBA) Nengeri. Tambah mega ungkus masang sistem tu enda kelalu mar, entara RM15,000 ngagai RM16,000 siti enda nyengkaum tambang perengka pengangkut nganjung sistem tu ngagai rumah panjai di menua ulu sungai tauka di menua pesisir ke jauh ari stesyen Pengerara Api enggau Penyah Penusah (BOMBA),” ku Richard ke udah ngaga sereta masang sistem nya kenyau ari Julai 2014.
Dalam timpuh tu ila, dijangka urung 10 buah sistem nya deka dipasang di rumah panjai, iya nya 5 buah di Bintulu lalu 5 buah agi di Limbang.
“Aku ngarapka perintah berunding ngaga projek tauka sistem tu ba rumah panjai ke jauh ari Stesyen Pengerara Api enggau Penyah Penusah (BOMBA) dikena nyeliahka pengerugi dituntung penusah angus,” pia ku iya ke nerima geran ari iM Sarawak.
Naka ke diatu, urung 130 iti projek sistem tu udah tembu digaga kenyau ari taun 2014 ngena ungkup belanja ti diberi iM Sarawak, ku Richard seraya ngarapka perintah nengeri nengah Opis Menteri Pemansang Menua Pesisir ulih meri ungkup belanja dikena ngaga sistem Pengerara Api tu di serata menua tu kelebih agi di menua pesisir enggau ulu sungai.
Ku Richard baru, sistem pengerara api tu beguna amat dipasang di rumah panjai ti mega lalu nyadika penambah perengka guna dikena ngerara api ngambika enda jampat nyerarai ngagai bilik bukai.
Enti sema sesebuah rumah panjai dituntung penusah angus, penanggul ti ditapi sdia iya nya jauh ari stesyen pengerara api sereta nadai kereban bukai kelimpah ari perengka pengerara api bala ti dikena selama tu.
Nya alai ku iya, enti ngaga sistem pengerara api nya ba rumah panjai, pekara ti enda tau enda diperundingka baka maksimum peninggi rumah panjai ari tanah urung 46 kaki (ari tanah nyentuk ke perabung), puku rata pemesai bilik ke tetiap ruang bilik urung 20 kaki, puku rata penyampau orang ti nguan sebuah rumah panjai urung 20 buah ruang bilik, puku rata pemanjai rumah panjai urung 400 kaki, sekeda rumah panjai bisi disediaka perengka pengerara api enggau puku rata ( Klasifikasi penyadi angus) Kelas A, (perengka ke mudah angus baka kayu, fabrik sereta plastik).
“Tambah mega tebal agi orang ti nguan rumah panjai tebal iya nya orang tuai enggau orang indu. Kelimpah ari nya sida nadai peneleba ngena perengka pengerara api,” ku iya.
Komponen ke beguna amat dikena ngaga sistem pengerara api nya di rumah panjai baka tangki ti ulih ngundan 1,200 gilin ai, injin 9 Kuasa Kuda, pam ai ke bekuasa tinggi (100psi/7 bar), hos kanvas 1 ½ inchi ke panjai 310 kaki,‘controlled dividing breeching’ enggau dua iti ‘diffuser nozzles’.
Peninggi ai ke ulih dipanchit ari tanah nyentuk ke perabung iya nya 50 kaki peninggi ngena 30 gilin ai/seminit dalam timpuh 40 minit.
“Tang enti baka api nya mau ditengah, sebedau iya ngerarai ke bilik sepiak, (diffuser nozzle) nya ulih dikena manchit ai ari kiba enggau kanan serta nyadi ‘ sistem penyelap’,” ku iya.
“Pemanah sistem tu, murah sereta mudah dikena orang ba rumah panjai laban sistem nya endang digaga muntang dikena orang tuai tauka nembiak, mudah dijaga lalu semina nyendiaka 1,200 gilin ai,” ku iya.
Ku Richard baru, entara penanggul ti dipelaba deka ditapi peranak rumah panjai ke bisi sistem tu baka enda nemu ngena, enda nemu endur ti patut dipanchitka ai maya nyadi penusah angus, penanggul injin enggai idup, paip ti dikena ari tangki ai pantis, hos api pantis ketegal kelalu angat, kutak besi endur naruh injin nya semina tan urung tiga taun aja sereta tangki ai singit laban tanah endur nudukka tangki ai nya kelalu lembut.
Taja pia ku iya, dikena mutarka semua penanggul nya orang ke nguan rumah panjai patut dilatih ngena sistem tu kelimpah tuai rumah nyadi orang endur betanya enti sema bisi sebarang pengerusak ba sistem nya.